Policia italiane ka arrestuar një shtetas shqiptar sapo ai zbriti në Aeroportin e Romës, pas ekstradimit nga Britania e Madhe. Ai ishte i shpallur në kërkim për akuzat e rënda të shfrytëzimit për prostitucion dhe trafikimit të drogës.
Sipas mediave italiane, i dyshuari fshihej prej kohësh në Angli, por falë bashkëpunimit ndërkombëtar mes autoriteteve italiane dhe britanike, u arrit lokalizimi dhe ekstradimi i tij. Arrestimi u krye menjëherë pas mbërritjes në Itali.
Hetimet kanë zbuluar se shqiptari kishte shfrytëzuar për prostitucion një grua me varësi nga droga, të cilës i siguronte kokainë në këmbim të marrëdhënieve seksuale me burra të ndryshëm. Ky abuzim ka zgjatur për një periudhë të gjatë kohore.
Gjithashtu, ai i kishte mohuar viktimës çdo kontakt me botën e jashtme, duke e izoluar plotësisht. Ajo nuk kishte akses në telefon, televizor, laptop apo pajisje të tjera elektronike.
Policia italiane konfirmon se ndaj të dyshuarit ekzistojnë prova të qarta për përfshirjen e tij në trafik droge dhe shfrytëzim prostitucioni. Identiteti i tij nuk është bërë ende publik, ndërsa hetimet për zbardhjen e plotë të rastit janë në vijim.