Ilirjan Selmani, 31-vjeçari, i arrestuar për vrasjen brutale të 52-vjeçares Kozeta Teço në Pogradec, ka dalë sot para trupit gjykues për tu njohur me masën e sigurisë.
Selmani ka mbërritur në gjykatë i shoqëruar nga forca të shumta policie.
Ai akuzohet për veprën penale vrasje për shkak të rrethanave familjare.
Ngjarja ndodhi 3 ditë me parë dhe i riu u arrestua disa orë pas krimit pasi policia zbuloi dinamikën e ngjarjes përmes kamerave të sigurisë në zonë.
Në dëshminë para policisë, Ilirjan Selmani tha se kishte një lidhje trevjeçare me viktimën dhe se, pavarësisht diferencës në moshë, ai e donte, duke shtuar se marrëdhënia mes tyre ishte e trazuar nga xhelozia, alkooli dhe dhuna.
31-vjeçari e ka goditur me thikë disa herë Kozeta Teçon pas një grindjeje, duke i shkaktuar vdekjen në vend.
Më pas ai ka tentuar të zhdukë gjurmët duke i vënë flakën banesës.
