Policia e Fierit ka vënë në pranga një 45-vjeçar të identifikuar si M.A., i dyshuar si shkaktari i aksidentit të rëndë të ndodhur dy ditë më parë në zonën e njohur si “Qafa e Koshovicës”, ku mbetën të plagosur katër persona.
Fillimisht u raportua se aksidenti ndodhi pasi drejtuesi i një automjeti tip “Benz” humbi kontrollin dhe u përplas me një pishë, çka solli shpërthimin e mjetit në flakë. Fatmirësisht, efektivi i policisë Klajdi Mustaj ndërhyri menjëherë, duke u futur mes flakëve dhe shpëtuar katër të plagosurit, duke u cilësuar si hero.
Pas hetimeve të kryera nga specialistët e qarkullimit rrugor, u zbulua se shkak i aksidentit nuk ishte humbja e kontrollit, por veprimet e 45-vjeçarit M.A., banues në Itali, i cili i kishte prerë rrugën automjetit tjetër, duke e detyruar shoferin të kryente manovra të rrezikshme që përfunduan në përplasje.
Policia njoftoi se pas përfundimit të veprimeve procedurale, M.A. u arrestua në flagrancë për veprat penale “Shkelja e rregullave të qarkullimit rrugor” dhe “Largimi nga vendi i aksidentit”.
