Shkëndija e Tetovës ka shkruar një tjetër faqe të artë në historinë e saj europiane, duke u kualifikuar në turin e 3-të të Champions League. Ekipi i drejtuar nga trajneri Jeton Beqiri arriti një fitore të madhe në transfertë, duke mposhtur FCSB-në e Rumanisë me rezultatin 1-2, pas fitores 1-0 në ndeshjen e parë në Maqedoni.
Rumunët kaluan të parët në avantazh me golin e Cissotit, por Shkëndija reagoi menjëherë me Latifin, duke barazuar rezultatin. Në pjesën e dytë, ishte Krstevski ai që përmbysi gjithçka dhe vulosi fitoren e madhe për ekipin shqiptar.
Me këtë kualifikim, Shkëndija siguron të paktën fazën e grupeve të Conference League, çka përbën një sukses të jashtëzakonshëm për klubin nga Tetova.
Në turin e tretë, Shkëndija do të përballet me kampionët e Azerbajxhanit, Qarabag, një kundërshtar me përvojë në Europë. Sido që të shkojë ky duel, rrugëtimi i kuqezinjve në arenën ndërkombëtare është i garantuar të vazhdojë edhe në vjeshtë.
