Këngëtarja britanike Jessie J është shtruar në spital vetëm gjashtë javë pasi iu nënshtrua një operacioni për kancerin e gjirit. Ajo bëri të ditur përmes një postimi në rrjetet sociale se është diagnostikuar me një infeksion dhe ka lëng në mushkëri, që po e pengon të marrë frymë normalisht.

Në një foto të publikuar nga shtrati i spitalit, ku shihet me kateter intravenoz në krah, Jessie shkroi:

“Gjashtë javë pas operacionit dhe e gjeta veten përsëri në të njëjtin repart spitalor. Nuk pritej ose nuk ishte planifikuar.”
Ajo sqaroi se kishte simptoma që ngjanin me një mpiksje gjaku në mushkëri, por fatmirësisht analizat e përjashtuan një gjë të tillë.

“Pas shumë testeve, u konstatua se kam një infeksion (që ende po përpiqen ta identifikojnë) dhe pak lëng në mushkëri.”
Këngëtarja është liruar nga spitali dhe vijon trajtimin në kushte ambulatore, ndërsa pranoi se procesi i rimëkëmbjes nuk ka qenë aspak i lehtë.

“Fizikisht, dita e operacionit ishte më e vështira. Psikologjikisht, kjo është koha më e vështirë që kam kaluar ndonjëherë. Sidomos si nënë e një fëmije të vogël, kur nuk mund të jem nëna që isha më parë.”
Në qershor, Jessie J zbuloi se ishte diagnostikuar me kancer në gji në fazë të hershme dhe se do të hiqej përkohësisht nga skena për të marrë kohën e nevojshme për trajtim dhe shërim. Tani, ajo vijon betejën me komplikimet pas operacionit, duke ndarë me ndjekësit e saj momente të sinqerta dhe të vështira nga kjo përvojë.