Një tjetër rast shqetësues vjen nga rrjetet sociale, ku ndjekja e trendeve virale ka përfunduar me pasoja serioze shëndetësore. Mariana Barutkina, një blogere ruse 32-vjeçare, ka pësuar frakturë në shtyllën kurrizore pasi tentoi të rikrijonte një sfidë të rrezikshme që po qarkullon në TikTok, frymëzuar nga reperja e njohur Nicki Minaj.
E njohur për përmbajtjen e saj në Instagram, ku ka mijëra ndjekës, Mariana u përpoq të imitonte pozën ikonike të Nickit nga videoklipi “High School” i vitit 2013 – një trend që është bërë viral, duke shtyrë përdoruesit të marrin poza akrobatike mbi këpucë me taka të larta dhe sende të paqëndrueshme.
Në përpjekje për t’u bërë pjesë e trendit, Barutkina vendosi të realizonte pozën mbi një kuti qumështi për foshnje, e cila qëndronte mbi një tenxhere, dhe kjo e fundit ishte vendosur mbi një banak mermeri. Struktura e paqëndrueshme rezultoi fatale: tenxherja rrëshqiti dhe ajo ra në dysheme, duke pësuar dëmtime serioze në shpinë.
Pas trajtimit mjekësor, u konstatua se blogerja kishte frakturë në shtyllën kurrizore dhe do të duhet të mbajë një korse për tre muaj si pjesë e rehabilitimit të saj.
