Një situatë e rënduar është shënuar sot në aksin Bardhoc–Vermicë të rrugës Morinë–Kukës, ku kamionë të shumtë nga Shqipëria drejt Kosovës kanë krijuar radhë kilometrike në pritje për të kaluar kufirin.
Gazetari i News24, Bledar Dokle, raporton se mjetet e tonazhit të rëndë janë parkuar në dy rreshta përgjatë rrugës, duke krijuar vështirësi në qarkullim dhe tension mes drejtuesve të mjeteve.
Shkak për këtë situatë është bërë masa e përkohshme e vendosur nga Ministria e Mjedisit dhe Transportit të Kosovës, e cila ndalonte qarkullimin e kamionëve nga ora 11:00 deri në 17:00 çdo ditë, për shkak të temperaturave të larta që kanë përfshirë rajonin.
Megjithëse masa ka përfunduar sot, radha e kamionëve vazhdon ende, për shkak se autoritetet doganore në Vermicë nuk po përballojnë dot fluksin e madh të mjeteve dhe procedurat doganore po ecin me ritme të ngadalta.
Radha e gjatë ka nisur që nga fshati Bardhoc dhe vijon deri në hyrje të pikës doganore të Vermicës. Kjo masë ndaluese ka qenë në fuqi për 15 ditët e fundit të muajit korrik, dhe sot ishte dita e fundit e zbatimit të saj.
Drejtuesit e mjeteve kërkojnë ndërhyrje për përshpejtimin e procedurave në kufi, ndërsa autoritetet nuk kanë dhënë ende një deklaratë zyrtare për zgjidhjen e kësaj situate.
