Presidenti ukrainas Volodymyr Zelensky tha të hënën se Presidenti Vladimir Putin ishte i vetmi zyrtar rus me të cilin ishte i gatshëm të takohej për të diskutuar për fundin e luftës.
Zelensky, duke iu drejtuar një auditori në Forumin Ekonomik Botëror në Davos, tha gjithashtu se organizimi i çdo bisedimi me Rusinë po bëhej më i vështirë, duke pasur parasysh veprimet e fundit të ushtrisë ruse.
Rusia mohon të ketë shënjestruar civilët në atë që e quan një “operacion special” për të çmilitarizuar Ukrainën.
“Presidenti i Federatës Ruse vendos për të gjitha”, tha Zelensky. “Nëse po flasim për përfundimin e kësaj lufte pa atë personalisht, ai vendim nuk mund të merret”.
Zelensky tha se zbulimi i vrasjeve masive në zonat e pushtuara nga trupat ruse më herët gjatë luftës, veçanërisht jashtë Kievit, e bëri më të vështirë organizimin e bisedimeve dhe ai do të përjashtonte çdo diskutim me zyrtarë të tjerë.
“Unë nuk mund të pranoj asnjë lloj takimi me askënd që vjen nga Federata Ruse përveç presidentit,” tha ai. “Dhe vetëm në rastin kur është në diskutim ndalimi i luftës. Nuk ka arsye të tjera për ndonjë lloj takimi tjetër.”
Negociatorët rusë dhe ukrainas kanë zhvilluar bisedime sporadike që kur forcat ruse hynë në Ukrainë, në fund të shkurtit, por të dyja palët thonë se bisedimet kanë ngecur./Liberale.al
