Prej disa ditësh Bordi i Transparencës është mbledhur më shpesh dhe sot ka ulur çmimin e naftës, duke e çuar për herë të parë që pas fillimit të krizës dhe luftës në Ukrainë, nën 200 lekë për litër.
Nga sot një litër naftë do të shitet me 198 lekë, duke e ulur në këtë mënyrë çmimin me 8 lekë. Sipas vendimit të 24 orëve më parë, një litër naftë kushtonte 206 lekë. Për sa i përket benzinës, një litër benzinë nga sot do të shitet me 180 lekë, nga 184 lekë që ishte më parë. Dhe një litër gaz do të shite me 69 lekë nga 71 lekë që ishte deri dje.
Çmimet e vendosura të karburanteve, 7 dhjetor 2022:
Çmimi i shitjes me pakicë i nënproduktit gasoil i standardit SSH EN 590 të jetë jo më shumë se 198 lekë/litri, ndërsa i shitjes me shumicë jo më shumë se 186 lekë/litër.
Çmimi i shitjes me pakicë i nënproduktit benzinë e standardit SSH EN të jetë jo më shumë se 180 lekë/litri, ndërsa i shitjes me shumicë jo më shumë se 168 lekë/litër.
Çmimi i shitjes me pakicë i nënproduktit gaz, të jetë 69 lekë/litri me pakicë dhe i shitjes me shumicë 57 lekë/litër për automjetet.
Çmimi i gazoilit për peshkim është vendosur 104 lekë/litër.
Çmimet e caktuara nga Bordi do të hynë në fuqi në datë 07 Dhjetor, ora 18.00, dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.
Bordi i transparencës që në krijimin e tij i është përmbajtur me përpikmëri në vendimet e tij lëvizjes së bursës Platts të Mesdheut për gazoilin, benzinën, si dhe faturave zyrtare të operatorëve.
Ministria e Financave dhe Ekonomisë ndjen detyrimin të sqarojë opinionin publik se jo çdo lëvizje e bursës së naftës bruto reflektohet në të njëjtën kohë dhe në të njëjtën masë në bursën e gazoilit dhe benzinës.
