Situata me zjarret në Jug të vendit/ Reagon ambasada amerikane

Ambasada amerikane ka reaguar lidhur me situatën e rëndë të krijuar nga zjarret në Shqipëri, ku pasditen e sotme u shënua viktima e parë në Gjirokastër.

Ndërsa publikon një video nga aksioni i Forcave të Armatosura nga ajri për shuarjen e flakëve, ambasada shkruan në “Facebook”, se SHBA kanë qenë dhe do të qëndrojnë gjithmonë krah Shqipërisë në kohë nevoje.

Deklarata e plotë

Lutjet tona shkojnë për ata që janë prekur nga vatrat e zjarreve në Shqipëri. Shtetet e Bashkuara kanë qenë dhe do të qëndrojnë gjithmonë krah Shqipërisë në kohë nevoje. Në këtë video, burrat dhe gratë e guximshëm të Forcave të Armatosura Shqiptare përdorin pajisje të dhuruara nga Shtetet e Bashkuara ndërsa luftojnë me zjarret në jug të vendit.

Pajisjet për shuarjen e zjarrit janë pjesë e një dhurimi prej 360,000 dollarësh të bërë nga Komanda Europiane e Shteteve të Bashkuara në vitin 2019. Ato përfshinin “kova Bambi”, kostume zjarrfikësish, sëpata, lopata dhe pajisje personale mbrojtëse. “Kovat Bambi”, të përdorura në këtë video, mbajnë ujë nëpërmjet helikopterëve dhe u mundësojnë atyre të mbushin sasi të mëdha në kohë të shkurtër, në mënyrë që të shuajnë zjarrin. #KrahPerKrah

Tags: ambasada e SHBA, gjirokaster, zjarre