Zbardhet letra e Qeverisë së Holandës drejtuar Parlamentit ku thekson se hapja e negociatave të anëtarësimit të Shqipërisë me Bashkimin Evropian është e parakohshme.
“Qeveria mirëpret hapat që Shqipëria ka ndërmarrë tashmë në fushën e vetting-ut radikal, në sundimin e ligjit, rritjes së operacioneve policore kundër krimit. Por Shqipëria duhet të bëjë më shumë në luftën kundër krimit të organizuar. SPAK duhet të jetë sa më shpejt funksional dhe Shqipëria të tregojë një rekord bindës në luftën kundër krimit të organizuar dhe korrupsionit. Për të përfunduar, Qeveria mendon se hapja tani e negociatave është e parakohshme”, thuhet në letër.
Në letrën e qeverisë holandeze bëhet edhe një pasqyrim i qëndrimeve që mbajnë shtetet e tjera anëtare të BE-së, veçanërisht i Gjermanisë.
Më herët Ministri i Jashtëm holandez, Stef Blok, deklaroi pas mbledhjes së qeverisë se Holanda beson se BE nuk duhet të fillojë bisedimet e pranimit me Shqipërinë.
Sipas tij, Shqipëria duhet të ndërmarrë hapa të mëtejshëm në trajtimin e korrupsionit dhe përmirësimin e sundimit të ligjit.
Dhoma e Përfaqësuesve të Holandës në qershor kaloi një mocion ku shumica u shpreh kundër çeljes së negociatave të Shqipërinë me Bashkikim Evropian.
Ndërsa për Maqedoninë Veriore rruga duket e lirë për të filluar bisedimet me BE për anëtarësimin.
