Dushi është një nga momentet më të relaksuara të ditës për shumë njerëz, por shpesh, pa e kuptuar, bëjmë disa gabime që dëmtojnë shëndetin e lëkurës sonë. Disa zakone të përditshme, që mund të duken të padëmshme, në fakt ndikojnë drejtpërdrejt në tharjen, irritimin dhe dëmtimin e saj.

1. Uji shumë i nxehtë – armik i lëkurës

Nëse jeni nga ata që preferoni të bëni dush me ujë shumë të nxehtë, është koha të rishikoni këtë zakon. Uji i nxehtë, sado i këndshëm të duket, është një ndër faktorët kryesorë që e than lëkurën. Ai largon vajrat natyralë mbrojtës që ndodhen në sipërfaqen e saj, duke çuar në dehidratim, ndjesi kruarje dhe lëkurë të ashpër.

2. Përdorimi i sfungjerëve të vjetër

Një tjetër gabim i zakonshëm është përdorimi i sfungjerëve të vjetër për larjen e trupit. Sfungjerët, për shkak të lagështisë së vazhdueshme, janë terren ideal për shumimin e baktereve dhe mykut. Kjo jo vetëm që mund të shkaktojë acarime të lëkurës, por rrit rrezikun e infeksioneve. Sfungjeri duhet ndërruar çdo muaj dhe duhet tharë mirë pas çdo përdorimi.

Si të kujdeseni më mirë për lëkurën gjatë dushit:

Përdorni ujë të vakët, jo të nxehtë.
Kufizoni kohën e dushit në 5–10 minuta.
Përdorni pastrues të butë dhe pa aromë të fortë.
Hidratoni lëkurën menjëherë pas dushit me krem hidratues.