Kryeministri Edi Rama ka bërë një apel të drejtpërdrejtë për shqiptarët që jetojnë në Greqi, duke i inkurajuar ata të kthejnë personalisht zarfe me votat e tyre për zgjedhjet e 11 majit, në vend që të presin shërbimin postar. Në një videomesazh të shpërndarë në Facebook, Rama theksoi se ka pasur një rritje të numrit të zarfeve të kthyer, por theksoi se është e rëndësishme që çdo individ të kontribuojë në këtë proces.
“Mos prisni që të vijë DHL për të marrë zarfet, por kthejini vetë në pikën përkatëse,” tha Rama, duke shtuar se ky është një mundim i vogël krahasuar me sakrificat që emigrantët kanë bërë për të arritur aty ku janë sot. Ai e cilësoi këtë veprim si një hap të rëndësishëm për të qenë “zot në vendin tuaj” dhe për të kontribuar në integrimin e Shqipërisë në Bashkimin Evropian.
Kryeministri gjithashtu vlerësoi atmosferën e ngrohtë dhe mbështetjen e qytetarëve gjatë takimit përmbyllës në Kavajë, duke e cilësuar atë si një “super Kavaja” dhe një dëshmi të ndryshimit të perceptimit për vendin. Ai theksoi se Shqipëria është në një rrugë të qartë drejt zhvillimit dhe integrimit evropian.
