Politikë

Negociatat/ Basha: Pazar Rama-Berisha, vulëhumburit pa asnjë kontribut në politikë ‘luftë’ për të ruajtur karrigen

Shkruar nga Liberale
Negociatat/ Basha: Pazar Rama-Berisha, vulëhumburit pa asnjë kontribut

Kreu i PD, Lulzim Basha thotë se pazari PS-Rithemelimi ka në thelb vetëm një qëllim, interesat e kryeministrit Edi Rama dhe Sali Berishës. Nga Kuvendi Zgjedhor në degën nr. 13 të PD në Tiranë, Basha tha se të dy ja dinë hallin njëri tjetrit dhe janë bërë bashkë për pazare në kurriz të shqiptarëve. Për Bashën, ky pazar synon të godasë rotacionin politik me qëllim që Rama mos të humbasë pushtetin. 

“Me një pazar të fëlliqur duan të flijojnë opozitarizmin dhe rotacionin politik me parullën o unë, o asgjë ose ndryshe pas meje kiameti. Pazari i turpshëm i 48 orëve të fundit, por që në fakt ka qenë tenxhere me presion prej fillimit. Hallexhinjtë e kësaj marke ia dinë gjuhën njëri-tjetrit, ia dinë ku i dhemb njëri-tjetrit dhe janë të gatshëm të bëjnë pazare me njëri-tjetrin për njëri-tjetrin, por jo për shqiptarët”, tha Basha.

Kryedemokrati shigjetoi edhe grupin e Bardhit, dikur krahu i tij djathtë që tashmë është bashkuar me Rithemelimin dhe u ul në tryezën e negociatave me PS. Ky Pazar sipas Bashës, ka edhe interesat e vulëhumburve që synojnë të ruajnë karrigen e deputetit në zgjedhjet e ardhshme parlamentare.

“Pazari i fundit, është padiskutim një Pazar i pastër për interesat në radhë të parë dhe mbi të gjitha të Edi Ramës, interesat e Sali Berishës dhe interesat e disa vulëhumburve që siç erdhën ashtu po ikin të katapultuar në politikë pa asnjë farë kontributi dhe që u janë ngjitur sytë, veshët, stomaku dhe të prapmet pas karrigeve që kanë qëllim të vetëm të ruajnë këto karrige duke sakrifikuar aspiratën e demokratëve dhe të shqiptarëve për rotacion”, tha Basha.

Basha thotë se i ashtuquajturi revolucion u shit për 2 komisione hetimore, për të cilat Rama theksoi se ka ndryshuar edhe ligjin duke e vështirësuar transparencën.

“Pesë muaj i ashtëquajturi revolucion, çfarë prodhoi? Prodhoi që Edi Rama të kalojë ça i desh qejfi. Nga buxheti, te aktet korruptive, te heqja e parave për pronarët, tek investimet strategjike pa asnjë kritikë opozitare, pa u dëgjuar zëri i opozitës në Parlament. Se në vend që të flisnin, i binin bilbilave. Për çfarë i ranë bilbilave? Që nga 8 të merrnin 2 komisione. Dhe këto 2 komisione, objekti është të shikojnë masat administrative dhe të përmirësojnë ligjet që mos të vjedhë Edi Rama. Sepse Edi Rama dhe Ilir Beqja vjedhin se janë ligjet e këqija. Këtu u katandis revolucioni, nga 8 në 2. Dhe nga këta të dy, njëri siç e keni parë dhe dëgjuar SPAK-u të hënën komunikon akuzat dhe po bëhet gati të çojë në burg të pandehurit. Për këtë pra u shit revolucioni. Asgjë. Madje më keq se asgjë, minus, sepse ligji për komisionet hetimore ka ndryshuar në mënyrë të njëanshme nga Edi Rama duke e bërë edhe më të vështirë, deri në kufijtë e pamundësisë transparencën”, tha Basha.

Liberale Newsroom

Poll
SHQIPENGLISH