Gjykata e Lartë ka rrëzuar rekursin e ish-Presidentit, Ilir Meta, i cili kishte kërkuar lirimin nga burgu, ku ndodhet prej datës 21 Tetor 2024.
Mësohet se togat e zeza kanë lënë në fuqi masën e sigurisë “arrest me burg” të dhënë nga Apeli i GJKKO-së më 19 Nëntor 2024.
“Ne lidhje me interesimin tuaj per ceshtjen penale me nr. 60003-00073-00-2025, Kolegji Penal i Gjykates se Larte, ka vendosur:
Lenien ne fuqi te vendimin nr.59 (87-2024-333) date 19.11.2024 te Gjykatës së Posaçme te Apelit per Korrupsionin dhe Krimin e Organizuar”, thuhet në vendimin e Gjykatës së Lartë.
Kujtojmë se Ilir Meta akuzohet nga SPAK për korrupsion, pastrim parash e fshehje pasurie lidhur me dosjet e bashkuara Cez-Dia, lobimi i ish-LSI në SHBA dhe shpenzimet e familjes së tij.
Ndaj tij, Gjykata e Posaçme dhe Apelit të GJKKO kanë caktuar masën “arrestit në burg”, duke bërë që Presidenti i PL-së prej afro 4 muajsh të mbahet i izoluar në paraburgimin “Jordan Misja” në kryeqytet apo siç njihet ndryshe 313-ta.
Po ashtu edhe deputetja Monika Kryemadhi me masë sigurie “detyrim paraqitje”, ka depozituar rekurs duke e konsideruar si të paligjshme.
