Politikë

Bardhi kërkesë Kuvendit: Zbatoni vendimin e Gjykatës Kushtetuese për mandatin e Olta Xhaçkës! Po e mbroni politikisht

Shkruar nga Liberale

Bardhi kërkesë Kuvendit: Zbatoni vendimin e Gjykatës Kushtetuese

Nënkryetari i Rithemelimit, Gazment Bardhi i ka dërguar sot zyrtarisht një shkresë Kuvendit, që të zbatojnë vendimin e Gjykatës Kushtetuese për mandatin e deputetes Olta Xhaçka.

Përmes letrës ai thotë se pengimi i zbatimit të vendimit të Gjykatës Kushtetuese për rastin e mandatit të deputetes Olta Xhacka, vjen pas evidentimit të qartë të faktit se familja e saj ka përfituar statusin e investitorit strategjik me firmë të Kryeministrit Edi Rama, në kushtet flagrante të shkeljes së ligjit dhe konfliktit të interesit.

“Ky rast merr përmasat e një mbrojtjeje të pastër politike dhe pengimit të drejtësisë, po të mbahen në konsideratë edhe të dhënat e reja të hetuara dhe bëra publike nga SPAK, nga ku ka rezultuar se pronësia mbi tokën është përfituar me dokumenta tërësisht të falsifikuara duke bërë të mundur që një tokë bujqësore, me një sipërfaqe në total prej 10.592 m2, e ndodhur në Dhërmi/Vlorë, në pronësi shtet, të tjetërsohet përmes transaksioneve tek të tretët në favor të subjektit privat në pronësi të bashkëshortit të deputetes Olta Xhacka, duke zhveshur shtetin nga pronësia mbi të dhe duke përfituar me dokumente të falsifikuara statusin e investitorit strategjik nga Kryeministri Edi Rama dhe të drejtën për të zhvilluar një projekt me vlerë 5 milion euro në fushën e turizmit.” – shkruan Bardhi.

Deputeti demokrat e konsideron të papranueshme mbrojtjen politike dhe pengimin ndaj drejtësisë që mazhoranca po bën për rastin e ish-ministres dhe deputetes Olta Xhaçka, duke penguar zbatimin prej 1 viti e 2 muaj të vendimit nr. 1/2023 të Gjykatës Kushtetuese, dhe ka kërkuar zbatimin e këtij vendimi dhe thirrjen e mbledhjes së Konferencës së Kryetarëve për ta përfshirë në seancën më të afërt plenare dërgimin e çështjes së mandatit të deputetes Olta Xhaçka për shqyrtim në Gjykatën Kushtetuese.

Liberale Newsroom

Poll
SHQIPENGLISH