Në qytetin Vigevano të Italisë, policia ka sekuestruar 27 kilogramë drogë në një apartament, ku u arrestua një 29-vjeçar me origjinë shqiptare. Gjatë kontrollit u gjetën 22 kilogramë hashash të ndarë në 122 blloqe brenda frigoriferit dhe 5 kilogramë kokainë të paketuar me imazhin e Al Pacinos nga filmi “Scarface” ose në qese të vulosura me nxehtësi, të fshehura në vende të ndryshme të banesës.
Hetimet u zhvilluan nga Karabinierët e Genovës dhe Vigevanos, të cilët ndoqën dhe arrestuan të riun pasi e panë me sjellje të dyshimtë. Në momentin e arrestimit, ai kishte edhe 58 gramë kokainë në posedim.
Në shtëpi u gjetën edhe 7 mijë euro para cash, që dyshohet se vijnë nga trafiku i drogës. Tani 29-vjeçari ndodhet në burgun e Pavias, ndërsa hetimet për rastin vazhdojnë.
