Fatjon Gjonaj, i dyshuari kryesor shqiptar në një rrjet të madh trafiku ndërkombëtar droge, është ekstraduar nga Emiratet e Bashkuara Arabe drejt Italisë. Ai u arrestua më 3 qershor në Dubai dhe mbërriti në aeroportin e Romës pasditen e së premtes, ku u transferua menjëherë në burg.

Gjonaj konsiderohet si një nga figurat kryesore të rrjetit që trafikonte sasi të mëdha kokaine, hashashi dhe marijuane nga Maroku dhe Spanja drejt Italisë. Ai dyshohet se ka bashkëpunuar ngushtë me Luca Lucci, ish-udhëheqës i tifozëve ultras të Milanit, i arrestuar më herët në prill 2025.

Hetimet e autoriteteve italiane zbuluan se në vetëm shtatë muaj, ky rrjet ka trafikuar më shumë se 3.5 ton drogë, duke përfituar miliona euro. Lënda narkotike transportohej me kamionë drejt një magazine pranë Milanos, ku më pas shpërndahej përmes një skeme të organizuar, që përfshinte edhe punonjës të Amazon për të shmangur kontrollet.

Gjithçka nisi pas një atentati në Milano në vitin 2019 ndaj Enzo Anghinellit. Rasti çoi në hetime të thelluara dhe arrestimin e 12 personave, përfshirë Luccin dhe më vonë edhe Gjonajn.

Autoritetet italiane e kanë quajtur arrestimin dhe ekstradimin e Gjonajt si një “goditje të rëndësishme ndaj trafikut të drogës në veri të Italisë”. Sipas tyre, shkatërrimi i këtij rrjeti do të ketë ndikim të madh në uljen e furnizimit me drogë në rajon. Hetimet pritet të vazhdojnë për të identifikuar bashkëpunëtorë të tjerë dhe lidhje të mundshme në shtete të tjera.