Ekonomi

75 mijë punonjës në rrezik, sektori fason paralajmëron protestë Kombëtare

Shkruar nga Liberale

75 mijë punonjës në rrezik, sektori fason paralajmëron

Ata thonë se janë në prag falimentimi dhe i kërkojnë qeverisë të ndërhyjë, për ruajtjen e 75 mijë vendeve të punës. Në të kundërt do të përballet me pasoja sociale për ekonominë.

Biznesmenë të këtij sektori dhe përfaqësues të punëtorëve janë mbledhur në Krujë për të diskutuar mbi situatën dhe hapat që do të ndërmarrin në bashkëpunim me sindikatat e punonjësve.

“Protesta kombëtare është kërkuar nga vetë punonjësit pasi po humbasin vendet e punës. Po flasim për sektorin manifakturë të veshjeve e këpucëve që ka mbi 75 mijë të punësuar e që ndodhet në krizën më të keqe. Bizneset kanë mungesë likujditeti dhe pamundësi për të paguar detyrimet që rrjedhin nga aktiviteti i tyre. Kursi i këmbimit e rritja e kostove, si dhe më së shumti indiferenca nga ana e qeverisë për t’u ulur në tryezë për të parë nga afër se si mund të amortizohet kjo humbje e bizneseve. Më kryesorja është impakti social. Në Krujë ku nuk ka aktivitete të tjera ekonomike ku do të shkojnë këta punonjës nëse dalin nga sistemi i punës”, tha sipërmarrësi, Edvin Prençe.

Pasojat e krizës janë ndjerë në këtë fillim viti me mbylljen e vendeve të punës në disa subjekte dhe mos-marrje pagash në kohë për disa të tjera, në një kohë kur qeveria po synon të çojë pagën në 900 euro pavarësisht analizës së produktivitetit dhe mundësive që ka ekonomia.

“Flasim për një pandemi, vetëm në 48 orët e fundit 1,100 vende pune të humbura, kryesisht gra, nëna. Nëse bllokohet ky sektor do kenë problematika që nga banka, transporti, lëndët e para etj”, shtoi ai. Fasonët tregojnë se po përballen me problematika të shumta, ndërsa kërkojnë mbështetjen e qeverisë si një domosdoshmëri.

“Kam marrë kredi për këtë investim që është bashkëkohor dhe i përshtatet kërkesës së klientit. Ne kërkojmë që shteti të na bëjë bilancin e vitit të kaluar dhe të na shohë të ardhurat e sa mund t’i japim punëtorëve. A mundet ta përballojmë a jo? Po shkojmë drejt mbylljes. Nuk mund ta shtyjmë, veç 3-5 muaj”, tha sipërmarrësi Muharrem Hoçja.

“Është radha e shtetit që si një ortak i mirë që është të na ndihmojë tani që kemi nevojë. Biznesi ka nevojë tani. Përndryshe hajde t’i mbyllim e t’i dërgojmë të gjithë punëtorët në shtëpi. Çmimet që ne i japim porositësve me kostot e larta që përballojmë nuk i pranojnë”, tha një tjetër sipërmarrës.

“Këtë problemin tonë para një viti e pati ekonomia kineze dhe shteti atje subvencionoi pagat e punonjësve pasi kjo do të jepte efekt zinxhir. Jemi detyruar me o ta mbyllim, o të largohemi diku tjetër”, u shpreh një tjetër.

Ky sektor kërkon lehtësira fiskale dhe subvencionim përmes zbatimit të një plani kundër papunësisë dhe varfërisë.

Shumë biznese të tjera nuk po gjejnë punëtorë, sepse Gjermania po i josh gjithmonë e më shumë të rinjtë dhe bizneset e kanë të pamundur që të përballojnë sfidat e  një tregu global me produktivitet shumë të lartë.

I vetmi shpëtim për ekonominë është që Shqipëria të orientohet nga produktiviteti dhe qeveria të subvencionojë ose të përkrahë çdo ndërmarrje ose organizatë publike apo private që është e orientuar nga prodhimi.    

Liberale Newsroom

Poll
SHQIPENGLISH