Komisioni Këshillimor për Titujt Vendor të Nderit në Bashkinë e Vlorës ka propozuar dhënien e titullit “Qytetar Nderi i Vlorës” për tre personalitete të shquara me origjinë nga ky qytet.
Mes tyre është Mira Murati, inxhinierja shqiptare që ka luajtur një rol kyç në zhvillimin e inteligjencës artificiale ChatGPT, duke sjellë vëmendje dhe krenari për Shqipërinë në mbarë botën.
Titulli është propozuar edhe për Dr. Andi Hoxhajn, profesor shqiptar i cili është nderuar me titullin “Oficer i Urdhrit Më të Shkëlqyer të Perandorisë Britanike (OBE)” për kontributin e tij në marrëdhëniet mes Mbretërisë së Bashkuar dhe Shqipërisë.
Ndërkohë, nderimi i tretë i propozuar shkon për tenorin e njohur Josif Gjipali, i cili ka përfaqësuar denjësisht artin shqiptar në skena të njohura të Evropës.
