Kreu i Partisë Demokratike, Sali Berisha është liruar nga masa e arrestit shtëpiak.
Gjykata e Posaçme (GJKKO) ka dhënë ditën e sotme vendimin për revokimin e masës së sigurisë “arrest shtëpie” për ish-kryeministrin Berisha.
Në një prononcim për mediet, avokati i Berishës, Genc Gjokutaj, deklaroi se me vendimin e sotëm ish-kryeministri është i lirë dhe mbi të nuk ekziston asnjë masë sigurie.
“Do të shikoni më tutje se çfarë do të ndodhë”- shtoi ai, pak minuta pasi GJKKO dha vendimin për heqjen e masës së arrestit shtëpiak ndaj ish-kryeministrit.
Gjokutaj tha se “vendimi absolutisht është i ekzekutueshëm, sot është i lirë”.
Vendimi u dha sot nga gjyqtarja Flojera Davidhi.
