Policia Kufitare intensifikon kontrollet në bregdetin e Vlorës – 41 mjete lundruese bllokohen për shkelje
Policia Kufitare dhe Njësia Policore Detare kanë rritur ndjeshëm praninë dhe kontrollet në det në kuadër të nisjes së sezonit turistik, me fokus të veçantë në zonat me fluks më të lartë, si Ksamil dhe Sarandë. Si rezultat i verifikimeve të kryera ditët e fundit, janë konstatuar shkelje të shumta nga drejtues të mjeteve lundruese, përfshirë mungesën e dokumentacionit, tejkalimin e kapacitetit të pasagjerëve dhe lundrimin jashtë perimetrit të sigurisë.
Policia njofton se janë kontrolluar gjithsej 132 mjete lundruese, nga të cilat 41 janë bllokuar për shkelje të ndryshme. Më poshtë është njoftimi i plotë i policisë:
Njoftimi i policisë:
Ksamil – Vlorë
Vijojnë intensivisht kontrollet nga Policia Kufitare dhe Njësia Policore Detare, në të gjithë vijën bregdetare të qarkut Vlorë, ndaj mjeteve lundruese, kryesisht ndaj atyre të argëtimit , për verifikimin e dokumentacionit dhe zbatimin e rregullave të lundrimit.
Nga 132 mjete lundruese të kontrolluara gjatë ditëve të fundit, nga Ksamili në Sarandë, 41 rezultuan në paligjshmëri .
Bllokohen 41 mjete lundruese (7 Jet Ski, 34 gomone dhe skafe).
Drejtuesit e këtyre mjeteve lundruese u ndëshkuan për shkeljet si vijojnë:
3 për shkelje të perimetrit të sigurisë – masa administrative 100 000 lekë secili;
2 për tejkalim të numrit të personave që lejohen në bord – masa administrative 30 000 lekë secili;
1 për ushtrim të aktivitetit pa licencë – masa administrative 100 000 lekë;
1 për mosregjistrim të pronësisë mbi mjetin lundrues – masa administrative 20 000 lekë;
34 për mungesë të dokumentacionit në bord – masa administrative 10 000 lekë secili.
Policia Kufitare e Vlorës apelon për pronarët dhe për përdoruesit e mjeteve lundruese, për respektimin e perimetrit të sigurisë së pushuesve në plazhe, për zbatim me korrektesë të kërkesave ligjore për daljen në det dhe për pajisjen me dokumentacionin përkatës.
Policia Kufitare dhe Njësia Policore Detare janë të angazhuara maksimalisht për të garantuar sigurinë në plazhe dhe në këtë kuadër, do të intensifikojnë kontrollet dhe monitorimin nga toka dhe në det, në të gjithë vijën bregdetare.
Ftojmë qytetarët që të denoncojnë në numrin pa pagesë 112, çdo rast paligjshmërie, duke iu garantuar anonimat, reagim të shpejtë dhe profesional.
