Adriatik Llalla, ish-prokurori i Përgjithshëm është shfaqur për herë të parë në publik që pas shpalljes në kërkim ndërkombëtar nga SPAK.

Ai është takuar me kryetarin e Ballit Kombëtar, Adriatik Alimadhi, i cili ka publikuar dy foto me ish-kryeprokurorin, teksa shfaqen duke bërë simbolin e shqiponjës në një kafe në Romë.

“Një takim pas disa vitesh me ish Prokurorin e Përgjithshëm të Shqipërisë. Mikun e familjes tonë Adriatik Llalla”, shkruan ai.

Kujtojmë se ish-Prokurori i Përgjithshëm Adriatik Llalla u arrestua në Romë në vitin 2021, ndërsa në 2023 ai fitoi azilin politik.

Ai u dënua me dy vite burg për fshehje pasurie në shtator të vitit 2021, por vendimi nuk u ekzekutua asnjëherë pasi Llalla u largua nga vendi drejt Italisë.

Vendimi mori formë të prerë më 22 shtator të atij viti. Llallës iu konfiskuan edhe pasuritë e dyshuara si të fshehura.