Nga Aranit Muraçi
Shqipëria konsiderohet një ndër vendet më të pasura me burime ujore në kontinent. Por thatësira e verës e ka detyruar vendin tonë që t’i drejtohet tregjeve ndërkombëtare për të blerë sërish energji
Korporata Elektroenergjetike Shqiptare ka kryer në ditët e fundit dy procedura për blerjen e energjisë elektrike, ndërkohë që çmimi me të cilin është siguruar sasia e energjisë është vlerësuar në mesatar nga ai që ka kërkuar, duke iu referuar çmimit më të ulët dhe çmimit më të lartë.
Fatura për blerjen e energjisë deri më tani, sipas shifrave të publikuara nga KESH duke llogaritur edhe 2 blerjet e fundit për muajin gusht përllogaritet në 235 mln euro.
Tenderi i fundit i hapur për blerjen e energjisë i takon periudhës 5 dhe 14 gusht. Ndërkohë, KESH ka publikaur rezultatet e tenderit që është mbyllur gjatë dy ditëve të fundit.
Në total, për këto 2 blerje janë shpenzuar rreth 28.6 mln euro, teksa fatura vetëm për muajin gusht përllogaritet në 46.6 mln euro. Blerja e energjisë me baza javore dhe jo ditore nga KESH ka pasur si qëllim që të ulet sadopak çmimi, megjithatë kriza ka bërë që ai të jetë sërish i lartë.
Sigurimi i kontratave afatgjata të energjisë deri në 3 vjet ishte një nga pikat kryesore të vendimit të qeverisë, që u miratua në tetor të vitit të kaluar në kuadër të emergjencës së furnizimit me energji të shpallur nga Këshilli i Ministrave e që synonte përballimin e situatës. Në një rast të tillë, pavarësisht krizës, Shqipëria do të siguronte energji në bazë të kontratës së firmosur në një periudhë normale.
Megjithatë veç thatësirës dhe krizës keqmanaxhimi ndër vite i këtij sektori po jep rezultate negative si për arkën e shtetit, ashtu edhe për ekonominë tonë.
Shqipëria prodhon rreth 90% të energjisë elektrike nga hidrocentralet. Edhe pse vendi ynë ka një sektor energjik të gjallë, është përballur shpesh gjatë viteve të fundit me një situatë të tillë të mungesës së energjisë.
Edhe pse mund t’i nënshtrohet një farë presioni për sa i përket mungesës së ujit deri në vitin 2040, një raport i fundit i ETF që analizon sektorin energjetik shqiptar dhe ndryshimin e nevojave për aftësi dhe punësim, tregon se burimet e rinovueshme, si energjia diellore dhe era, ofrojnë potencial ende të pashfrytëzuar nga vendi ynë.
Sfidat aktuale me të cilat përballet sektori energjetik shqiptar sillen rreth nevojës për të diversifikuar furnizimin me energji, për të rritur efikasitetin dhe kursimet, si dhe për të përmirësuar menaxhimin e rrjetit. Falë rritjes ekonomike, konsumi i energjisë është rritur me 10% midis 2009 dhe 2016. Por vendi ynë për më tej duhet të zhvillojë zgjidhje të reja energjetike duke ruajtur në të njëjtën kohë qëndrueshmërinë mjedisore.
Si rezultat, ka një tendencë në rritje për t’u fokusuar në dixhitalizimin dhe përdorimin e teknologjisë moderne si një mjet për të nxitur më shumë inovacione në sektorin e energjisë, një që lejon prodhim, transmetim dhe shpërndarje më efikase të energjisë.
Raporti i ETF përfundon me një sërë rekomandimesh që përfshin rritjen e ndërgjegjësimit të përgjithshëm për përfitimin e teknologjive të rinovueshme dhe vlerën e tyre të shtuar për bizneset, së bashku me forcimin e kanaleve të komunikimit ndërmjet komunitetit arsimor dhe biznesit. Për më tepër, ai nënvizon rëndësinë e zhvillimit të një strategjie afatgjatë mbarëkombëtare që do të vepronte si një udhërrëfyes për zhvillimin e sektorit energjetik përsa i përket investimeve, projekteve të ardhshme zhvillimore dhe implikimeve të punësimit dhe aftësive. /Liberale.al/
