Aktualitet

SHIFRA E DITËS: 10 vendet e para të lindjeve, Anglia nis të ‘shqiptarizohet’

Shkruar nga Liberale

Nga Aranit Muraçi

Në Itali studentët e huaj shqiptarë zënë vendin e dytë, emigrantët shqiptarë në Greqi zënë vendin e parë, ndërsa thuajse në çdo vend tjetër të Bashkimit Europian shqiptarët vit pas viti po shtojnë numrat, ndërsa anasjelltas, vendi po braktiset nga të rinjtë.

Shqipëria është klasifikuar këtë vit në 10 vendet e para të fëmijëve të lindur në Britaninë e Madhe, me nëna dhe baballarë të huaj. Të dhënat zyrtare tregojnë se shqiptarët janë klasifikuar për herë të parë në 10 vendet e pata të lindjeve, për lindjet e fëmijëve që u përkasin nënave dhe baballarëve, të cilët nga ana e tyre kanë lindur jashtë Britanisë së Madhe.

Vendi ynë, një vend jo anëtar i BE-së është vendi i tetë më i zakonshëm i lindjeve të fëmijëve me baballarë shqiptarë, sipas të dhënave të fundit nga Zyra për Statistikat Kombëtare Britanike, kurse Rumania është vendi më i zakonshëm i lindjeve për nënat e lindura jashtë Mbretërisë së Bashkuar. Për baballarët e lindur jashtë Britanisë së Madhe, Pakistani mbetet vendi më i zakonshëm i lindjeve në Mbretërinë e Bashkuar.

[caption id="attachment_1264065" align="alignnone" width="1036"] Fëmijët e lindur në Britani nga baballarë të lindur në vendet e tjera, Shqipëria e teta në listën botërore[/caption]

Anglia nis të ‘shqiptarizohet’

Shqipëria është një vend i vogël me një popullsi nën 3 milion banorë, krahasuar me vendet e tjera, ndaj edhe pesha specifike e ngjit atë ndër vendet e para përsa i përket numrit të fëmijeve të lindur në Britani, me prindër shqiptarë. Të dhënat e fundit tregojnë se vitin e kaluar më shumë se një e treta (34.2 për qind) e të gjithë fëmijëve të lindur në Angli dhe Uells kishin njërin ose të dy prindër të lindur jashtë Mbretërisë së Bashkuar. Ky tregues pësoi një rënie të lehtë nga 34.8 për qind që ishte në 2020.

Përqindja e lindjeve në Angli dhe Uells në 2021 nga gra të lindura jashtë Mbretërisë së Bashkuar ra në 28.8 për qind nga 29.3 për qind që ishte në vitin 2020. Sipas shifrave zyrtare, 445,055 fëmijë lindën nga gra të lindura në Mbretërinë e Bashkuar vitin e kaluar, krahasuar me 179,726 lindje nga nëna të lindura jashtë MB, ose 11,031 lindje më shumë të grave të lindura në Mbretërinë e Bashkuar në 2021 krahasuar me vitin 2020. Për gratë e lindura jashtë Britanisë së Madhe, numri i përgjithshëm i lindjeve mbeti i ngjashëm me shifrat e vitit 2020.

U regjistruan gjithsej 624,828 lindje në Angli dhe Uells në 2021, një rritje prej 1,8% nga 613,936 lindje që ishin regjistruar në vitin 2020, shifër më e ulët se ajo e vitit 2019 (640,370); Viti 2021 mbetet në përputhje me tendencën afatgjatë të uljes së lindjeve para pandemisë së koronavirusit (COVID-19). Normat e fertilitetit u rritën në përgjithësi; megjithatë, për grupmoshat më të reja norma e lindshmërisë pësoi rënie, ndërsa grupmoshat më të vjetra njohën rritje të normave të lindshmërisë.

[caption id="attachment_1264066" align="alignnone" width="1037"] Fëmijët e lindur në Britani nga nëna të lindura në vendet e tjera, Shqipëria e dhjeta në listën botërore[/caption]

“Sh”popullimi i Shqipërisë

Për herë të parë që nga viti kur nisi të matej popullsia e vendit, popullsia e Shqipërisë pësoi tkurrje në vitin 2021, sipas të dhënave të fundit të INSTAT. Gjatë vitit 2021 lindën 27.284 foshnja, duke shënuar një rënie me 2,8 %, krahasuar me një vit më parë. Gjatë vitit 2021 humbën jetën 30.580 persona, duke shënuar një rritje me 10,8 %, krahasuar me një vit më parë.

Shtesa natyrore e popullsisë në tremujorin e katërt 2021 ishte negative: 898 vdekje më shumë se sa lindje. Ndërsa në të gjithë vitin 2021 shtesa natyrore ishte 3.296 vdekje më shumë se sa lindje. Shtesa natyrore negative për vitin 2021 është ndikuar edhe nga situata e pandemisë Covid-19, raportoi INSTAT.

Sipas shifrave të INSTAT, numri i lindjeve për tremujorin e parë të vitit 2022 është 6.056, duke shënuar një rënie me 4,2 %, krahasuar me tremujorin e parë 2021.

Numri i vdekjeve për tremujorin e parë 2022 është 7.938, duke shënuar një rënie prej 22,3 %, krahasuar me tremujorin e parë 2021. Shtesa natyrore e popullsisë në tremujorin e parë 2022 tregon se pati sërish 1.882 vdekje më shumë se sa lindje. Sipas Institutit të Statistikave, në tremujorin e parë 2022, dy qarqe të vendit kanë shënuar shtesë natyrore pozitive të popullsisë, ndërsa në dhjetë qarqe të tjera, shtesa natyrore e popullsisë ishte negative. Në tremujorin e parë 2022 qarku me shtesën natyrore më të lartë ishte  Tirana, me 203 lindje më shumë sesa vdekje, ndërsa qarku me shtesën natyrore më të ulët është Korça, me 379 vdekje më shumë se sa lindje.

Sikur të mos mjaftonin këto shifra, edhe emigracioni po ndikon negativisht në shpopullimin e popullsisë. /Liberale.al/

Liberale Newsroom

Poll
SHQIPENGLISH