Aktualitet

Sekuestrohen dhjetëra doza kokainë, arrestohet trafikanti 30-vjeçar

Shkruar nga Liberale
Sekuestrohen dhjetëra doza kokainë, arrestohet trafikanti

Policia e Tiranës vijon punën për parandalimin, evidentimin dhe goditjen e veprimtarisë kriminale në fushën e narkotikëve.

Gjatë një aksioni të fundit, policia ka goditur një rast të veprimtarisë kriminale në fushën e shpërndarjes së lëndëve narkotike në doza, duke arrestuar trafikantin Endrit Murrani dhe proceduar penalisht 2 shtetas të tjerë, për veprën penale “Moskallëzim krimi”.

Gjithashtu, janë sekuestruar dhjetëra doza me kokainë dhe një shumë parash të dyshuara të përfituara nga kjo veprimtari kriminale.

Njoftimi i policisë:

Specialistët e Seksionit për Hetimin e Narkotikëve, në vijim të punës së pandërprerë për kontrollin e të gjithë territorit, me qëllim evidentimin dhe kapjen e personave që qarkullojnë me lëndë narkotike, merren me shpërndarjen e tyre apo i mbajnë ato në banesë, kanë goditur një tjetër rast të shpërndarjes së lëndëve narkotike, duke arrestuar në flagrancë shtetasin:

E. M., 30 vjeç, pasi, në rrugën “Ymer Kurti”, gjatë kontrollit të ushtruar nga Policia në automjetin me të cilin ky shtetas qarkullonte u gjetën 67 doza lëndë narkotike kokainë, një shumë lekësh që dyshohen se janë të përfituara nga aktiviteti kriminal i shpërndarjes së lëndës narkotike dhe 1 aparat celular, të cilat janë sekuestruar në cilësinë e provave materiale bashkë me automjetin.

Në vijim të veprimeve u proceduan penalisht në gjendje të lirë edhe shtetasit E. G. dhe E. Gj., pasagjer në mjetin me drejtues E. M., pasi dyshohen se kishin dijeni për këtë fakt dhe nuk kanë kallëzuar në organet kompetente.

Materialet iu dërguan Prokurorisë së Rrethit Gjyqësor Tiranë, për veprime të mëtejshme hetimore.

Liberale Newsroom

Poll
SHQIPENGLISH