Nga Red Varaku
Integrimi i jo vetëm i Shqipërisë por i gjithë rajonit në Bashkimin Europian, sidomos pas realitetit të ri gjeopolitik të krijuar pas ndërhyrjes ushtarake ruse në Ukrainë , është objektivi më i rëndësishëm i diplomacisë Amerikane dhe asaj Europiane.
Që kjo të realizohet duhet të përmbushen disa kritere , por kriteri më i rëndësishëm mbetet niveli i demokracisë, e cila duhet të jetë detyrimisht përfaqësuese dhe funksionale, qoftë edhe në nivele minimale në mënyrë që të kemi një shtet të së drejtës dhe mirëqenie për qytetarët .
Kjo sepse një demokraci jopërfaqësuese dhe jofunksionale prodhon automatikisht këtë realitet të ngjashëm me një “banana republic”.
Prodhon varfëri ekonomike, mjerim social, institucione të kapura dhe kësisoj shkatërron premisat për një shtet të së drejtës dhe me një standart ekonomik të pranueshëm për në BE.
Natyrisht që demokracia të bëhet perfaqesuese dhe funksionale duhet goditur mekanizmi që e ka bllokuar dhe e ka marrë peng atë. Po cili është mekanizmi që e ka bllokuar dhe mban peng demokracinë shqiptare?
Mekanizmi që e mban peng atë është marrëveshja e ndryshimeve kushtetuese të 2008, e cila i ktheu kryetarët e partive në pronarë të këtyre partive, që pas kësaj kishin mundësi ta trajtonin partinë si mall për treg për interesat e tyre.
Kalimi nga mazhoritar në proporcional rajonal ishte një dhuratë e çmuar për një parti që ka shtatëdhjetë vjet në pushtet, sepse një parti e tillë i merr votat paketë, ndaj fiton lehtësisht çdo palë zgjedhje në tavolinë.
Pra, marrëveshja e 2008 praktikisht i dhuroi pushtetin në tavolinë të majtës dhe efektin e parë kjo marrëveshje e dha menjëherë në zgjedhjet e 2009, ku PD u detyrua të bënte koalicion paszgjedhor me një parti puro të majtë si LSI.
Pastaj siç e dimë pas 2013 votat për të majtën kanë ardhur duke u shtuar, kjo jo vetëm për shkak të vjedhjes së votave, por kryesisht për shkak të garancisë që jep kjo formulë.
Edhe asgjësimi i demokracisë lokale përmes një reforme të njëanshme territoriale është gjithashtu pasojë e kësaj marrëveshje, sepse PS-LSI-PDIU kishin marrë aq shumë deputetë për shkak të 2008, sa i kishin votat me tepri për të vazhduar përpara me këtë deformim.
Pra, gjithçka që shohim përreth, përfshi edhe krizën e rëndë brenda opozitës, është pasojë e ndryshimeve kushtetuese të vitit 2008, sepse prej këtij viti duket qartë pafuqia e qytetarëve për të ndryshuar me votë këtë realitet.
Shkurt, marrëveshja e 2008 ishte një komplot politik i mirëfilltë kundër votës së lirë dhe demokracisë në emër të interesave të një grushti individësh.
Ndërkohë, për të rikthyer demokracinë perfaqesuese dhe funksionale ka vetëm një mundësi : shkallmim i establishmentit politik që prodhoi 2008 përmes reformës në drejtësi si dhe një reformë e thellë kushtetuese ( zgjedhore , territoriale) që t’i rikthejë qytetarëve fuqinë për të ndryshuar elitën politike përmes votës.
Vetëm kështu çmontohet establishmenti i korruptuar që ka bllokuar zhvillimin e vendit, vetëm kështu shkojnë përpara reformat jetike dhe vetëm kështu fillojnë dhe lëvizin ingranazhet demokratike.
Vetëm kjo është rruga që garanton transformimin e Shqipërisë në një vend me standarte normale ekonomike, ku garantohet sundimi i ligjit dhe ku qytetarët vendosin me votën e tyre për jetën e tyre dhe për të ardhmen e fëmijëve të tyre.
Kjo sigurisht sjell në mënyrë të pashmangshme dhe integrimin në Bashkimin Europian, duke realizuar kështu jo vetëm një objektiv madhor të partnerëve tanë historikë, por edhe ëndrrën shekullore të popullit shqiptar për të jetuar me dinjitet dhe në paqe mes kombeve më të zhvilluara në glob.
Ndaj, muajt në vazhdim janë vendimtare për ndryshimin epokal që do të transformojë në mënyrë të pakthyeshme të ardhmen tonë drejt zhvillimit dhe demokracisë. /Liberale.al/
