Gazetarja nga Kosova është kërcënuar me jetë, pas disa komenteve që ka bërë lidhur me sjelljen e Granit Xhakës, në ndeshjen Serbi-Zvicër, 2-3.
“Akti i Granit Xhakës, është për turp. Akt prej një rrugaçi. Dhe, fatkeqësia është që asnjë nuk la pa e shpërnda atë foto. Pra, zero nivel, në një shtet të tanë!”, shkroi ajo në statusin që u shoqërua me reagime dhe madje kërcënime në adresë të saj.
Avokati, Arianit Koçi, ka publikuar mesazhet kërcënuese dhe të rënda që persona të ndryshëm ia kanë dërguar analistes, Zana Avdiu. Koçi ka shkruar se mund edhe të mos pajtohemi me analisten Zana Avdiu, por kërcënime të tilla, janë të papranueshme.
Koçi, po ashtu ka treguar se këto kërcënime do t’i denoncojnë në Polici.
“”Kam met t’qu bashk me hamiden natan” ose “… t’shkon jeta pr lesh” – janë disa prej shumë kërcënimeve që po i merr Zana Avdiu. Hamidja si kërcënim është gruaja shtatzënë, që u vra mizorisht nga burri i saj në Prishtinë. Ka pasur edhe fyerje karshi saj.
Ç’është e vërteta, ka qenë vetëm një reagim i Zana Avdiut, teksa ka kritikuar gjestin e Xhakës në fushë. Dhe është shprehur mendimi i saj, duke arsyetuar se nuk mund të mburremi me gjeste të pahijshme, si komb, ndërkohë që mund të promovojmë anët pozitive të ndeshjes, pra fitoren, simbolet kombëtare etj. Por çuditërisht askush nga kërcënuesit nuk e ka vënë re, që e njëjta gazetare i është gëzuar si të gjithë të tjerët fitores së Zvicrës ndaj Serbisë dhe paraqitjes së Granit Xhakës dhe Xherdan Shaqirit. Ajo ka ndarë statuse si shumica e shqiptarëve që e provojnë këtë gëzim.
Dhe pavarësisht se në ndeshjet e futbollit nuk kontrollohen veprimet nga emocionet e tifozëve aq më pak të futbollistëve, dhe sigurisht veprimi i Xhakës nuk ishte prej një “rrugaçi”, mendimi i saj duhet respektuar. Ndoshta fjala “rrugaç” e përdorur për Granit Xhakën nuk është aspak e duhura, madje tingëllon fyese për atë që përfaqëson kapiteni i Zvicrës te shqiptarët, dhe është ndoshta ajo fjalë që ka revoltuar tifozët. Sepse, një fjalë e rëndë vret më shumë se plumbi, – thotë populli. /Liberale.al/
