Italianët vazhdojnë të kërkojnë dhe të gjejnë arsye pse Shqipëria u kthye këtë verë në një destiancion turistik për shumë turistë të huaj, përfshirë edhe ata italianë. Sipas të dhënave zyrtare, nga të huajt që vizituan vendin tonë, Italia kryesonte listën e vizitorëve.
Ndërkohë një turist italian që vizitoi së fundmi Shqipërinë me familjen e tij ka publikuar një foto të faturës nga një restorant tipik në Tiranë. Ai tregoi se sa shpenzoi dhe çfarë hëngri, ndërsa “tuttonotizie.eu” nisur nga fatura e publikuar prej turistit italian, i ka dedikuar një artikull çmimeve të lira në Tiranë, (artikulli i medias italiane.)
Artikulli i plotë:
Shqipëria ishte destinacioni më i preferuar turistik i verës. Shumë turistë italianë kanë vendosur të kalojnë pushimet verore në këtë vend fantastik ballkanik i cili ndodhet në anën tjetër të Adriatikut. Arsyeja kryesore që shtyu turistët italianë drejt Shqipërisë ishin çmimet. Kostoja mesatare e jetesës në Shqipëri në fakt është më e ulët se në Itali dhe vendi ofron mundësinë për të kaluar pushimet me çmime të përballueshme . Në çdo rast, si në çdo vend tjetër ku ka mbërritur turizmi masiv , duhet të jeni shumë të kujdesshëm ndaj kurtheve turistike .
Shumë shpesh qytetarët italianë vizitojnë zonën bregdetare të Shqipërisë pasi në disa vende deti është i pastër dhe shërbimet që u ofrohen turistëve janë vërtet të mira. Në veçanti, ndër zonat më të vizituara të vendit gjejmë qytetet e Sarandës dhe Ksamilit, të cilat u pushtuan nga “stuhia turistike” këtë verë. Pavarësisht kësaj, turistët italianë që mbërrijnë në Shqipëri me avion zbarkojnë kryesisht në kryeqytetin shqiptar, Tiranë. Dhe disa vendosin ta vizitojnë këtë qytet të bukur. Kryeqyteti shqiptar është i famshëm për bunkerët e tij prej betoni, që të kujtojnë kohën e komunizmit. Enver Hoxha, një nga diktatorët komunistë më të egër në botë, midis viteve ’60 dhe ’80 kishte më shumë se 750,000 bunkerë të ndërtuar në të gjithë vendin për të mbrojtur popullsinë nga një sulm i mundshëm i armikut.
Turistët që ndalojnë në Tiranë nuk mund të mos provojnë kuzhinën tipike shqiptare në restorantet e kryeqytetit. Një nga gatimet tradicionale më të përhapura në Shqipëri, ashtu si në pjesën tjetër të Ballkanit, janë qoftet e qengjit me erëza, të cilat ndonjëherë duken si salsiçe të vogla.
Një turist italian i cili ka vizituar kryeqytetin shqiptar me familjen e tij dhe e ka shijuar këtë delikatesë në një restorant tradicional në Tiranë, ka mbetur shumë i kënaqur me çmimet. Në total, turisti shpenzoi 8750 lekë ose rreth 82 euro për një darkë, për 5 persona . Përveç 5 porcioneve me qofte ai pagoi 400 lekë (rreth 3.50 euro) për secilën. Turisti mori edhe: 9 pita të pjekura në skarë (720 lekë – 6.50 euro ), një pjatë me perime (400 lekë – 3.50 euro ), 3 porcione patate të skuqura (900 lekë – 8, 50 euro ), një porcion sallatë (350 lekë – 3.30 euro ), dy gota verë (700 lekë – 6.60 euro ), 2 gota raki, pije tradicionale shqiptare, (300 lekë – 3.30 euro ), 4 birra të mëdha në rubinet (1600 lekë – 15 euro ), 3 Amari del capo (1200 lekë – 11.20 euro ) dhe një porcion bukë (400 lekë – 3.70 euro ). Një faturë, pra, që nga ana e turistit u përshkrua si e “shkëlqyer”.
