Aktualitet

Përse po boshatiset Vlora, në mes të sezonit turistik?

Shkruar nga Liberale
Përse po boshatiset Vlora, në mes të sezonit turistik?

Kryebashkiaku i Vlorës, Dritan Leli, doli dhe bëri thirrje publike që pushuesit të zgjedhin Vlorën, pasi qyteti bregdetar i jugut afron çmime konkurruese.

Por mesi i korrikut e gjen Vlorën gati të zbrazët nga turistët.

Plazhet e qytetit thuajse janë bosh ndërsa hotelet nuk i kalojnë 50% te kapaciteteve.

Për pushuesit shqiptarë në zona të ndryshme çmimet ndryshojnë, por sërish mbeten të shtrenjta.

“Çmimet më duken më ndryshe se nga Tirana, por çadrat i rrisin çmimet përditë. Më vjen keq se edhe pastërtia nuk është në nivelin e duhur, kanë mundësi më shumë të bëjnë, varet dhe nga vetë banorët, por duhet punë më e madhe edhe nga bashkia”, thotë një pushuese.

Për turistët e huaj, çmimet janë të ulëta në krahasim me vendet e tyre, por sërish të larta për Shqipërinë. “Jam nga Gjermania, hera e tretë që vij në Vlorë. Në krahasim me Gjermaninë, çmimet janë më të ulëta, por nga vjet këtë vit janë më të shtrenjta.

"Jam nga Kosova, dje kam ardhur,  kam qenë edhe herë të tjera. Çmimet? Me shtrenjtë, shumë më shtrenjtë”, shprehen ata. Vetë menaxherët e hoteleve konfirmojnë se sezoni është i vakët. Çmimet për një natë shkojnë deri në 350 euro.

“Çmimet vjet kanë variuar nga 120 euro-250 euro, ndërsa këtë vit fillojnë nga 150-350. Nuk mendoj që është arsyeja kryesore rritja e çmimeve, mendoj qe turistët e huaj këtë vit janë shumë herë me të pakët për të mos thënë inekzistent, mungon turizmi elitar.”

Kemi një ndryshim të çmimeve rreth 20- 30% , konkretisht nëse çmimi i një dhome çift shkonte deri në 60 euro sivjet shkon deri në 80 euro. Një dhomë triple shkonte 90 euro sivjet shkon 110 euro. Përsa i përket prenotimeve, vjet në datën 8 korrik nisi fluksi i madh, sivjet jemi duke pritur ende”, sipas tyre.

Për kreun e sektorit hotelier për jugun, Adnand Aliaj prenotimet janë në 50% të pritshmërive. Problematikë mbeten çmimet e larta. “Duhen parë pak edhe politikat e brendshme për të ruajtur një standard dhe me vendet që kemi afër sepse konkurrenca është shumë e fortë duke parë Malin e Zi, Greqinë, mundësia e hapjes për këto shtete tani është e mundshme dhe ndoshta ndikon te çmimet. Presim fundin e korrikut dhe gushtin”, theksoi Aliaj.

Çmimi i shezlongëve nis nga 500 lekë në zonën e Lungomare për të vijuar me 1 mijë deri 2 mijë lekë, duke u zhvendosur gjatë vijës bregdetare.  Rritja e çmimeve duket se po tkurr kohëzgjatjen e sezonit. Pritshmëritë për muajin korrik janë nën mesatare.

Vlorës i mungon gati gjysma e pushuesve të zakonshëm. Pas pandemisë sezoni turistik pritej të sillte më tepër pushues por i dha një tjetër goditje turizmit të qytetit bregdetar. Llogaritë e gabuara me çmimet duket se po japin efektin e tyre negativ. Kriza e çmimeve ka bërë që shumë pushues të anulojnë pushimet, ose të zgjedhin një destinacion më të lirë.

Liberale Newsroom

Poll
SHQIPENGLISH