Aktualitet

Përplasi një furgon në gjendje të dehur, arrestohet punonjësi i policisë

Shkruar nga Liberale
Përplasi një furgon në gjendje të dehur, arrestohet

Një efektiv policie është arrestuar pasi teksa po drejtonte automjetin në gjendje të dehur ka aksidentuar një furgon.

Agjencia e Mbikëqyrjes Policore raporton se efektivi me iniciale  R.XH.,  me detyrë Trup Shërbimi në Stacionin e Policisë Kufitare Pustec, u arrestua në flagrancë.

58 vjeçari po shkonte të merrte detyrën, kur u aksidentua.

Njoftimi i plotë:

Agjencia e Mbikëqyrjes Policore (Rajoni Elbasan – Korçë) arrestoi në flagrancë punonjësin e Policisë, Inspektor R.XH., 58 vjeç, me detyrë Trup Shërbimi në Stacionin e Policisë Kufitare Pustec, në Drejtorinë Vendore për Kufirin dhe Migracionin Korçë.

Ai dyshohet për veprën penale “Drejtimi i automjeteve në mënyrë të parregullt”.

Sot rreth orës 17:25, duke drejtuar mjetin në rrugën nacionale Korçë – Bilisht, është përfshirë në aksident rrugor me dëme materiale, me një mjet tip furgon.

Nga testet e kryera në vendngjarje ka rezultuar se punonjësi i Policisë kishte konsumuar alkool tej normave të lejuara. Ai ishte duke shkuar për të marrë detyrën.

Materialet procedurale do t’i përcillen Prokurorisë Pranë Gjykatës së Shkallës së Parë të Juridiksionit të Përgjithshëm Korçë.

Liberale Newsroom

Poll
SHQIPENGLISH