Rithemelimi zhvilloi të dielën votimet për primaret, ku u përcaktuan kandidatët që do të kandidojnë për zgjedhjet lokale të 2023. Për Bashkinë e Tiranës, nuk ka ende një kandidat, pasi asnjë nuk arriti të sigurojë mbi 50% të votave.
Në këtë mënyrë, gara do të shkojë në balotazh mes dy kandidatëve më të votuar, Belind Këlliçi dhe Ilir Alimehmeti. Deputeti Këlliçi mori më shumë vota nga të gjithë, 4040, i ndjekur nga Alimehmeti me 2196 vota.
Raundi i dytë do të zhvillohet më 11 dhjetor. Ata kanë reaguar në rrjetet sociale, duke falënderuar votuesit e tyre.
“Pas një gare të bukur dhe pozitive me kolegë demokratë të nderuar, raundi i parë kaloi me balotazh. Faleminderit të gjithë juve që më mbështetët, më votuat dhe më kualifikuat për raundin e dytë më 11 dhjetor 2022! Faleminderit shpirtit të bukur të të rinjve që m’u bënë krahë në çdo moment! Sonte pushojmë, nesër rifillojmë!”, shkruan Alimehmeti.
Nga ana e tij, Këlliçi ka thotë se karakteri i tij është me që të flasë me votë dhe jo me fjalë, gjë që sipas tij e tregoi edhe rezultati.
“Do të shkojmë në raundin e dytë, për të bindur çdo demokrat se ky proces është garancia më e madhe që opozita të ketë kandidatin e saj më të fortë në betejën e Majit.
Do të punoj orë pas ore për çdo votë demokrati, për t’ju përfaqësuar me nder në përballjen e madhe të 14 majit.
Ju falenderoj për të gjithë mbështetjen tuaj të pakursyer! E di se nuk mjaftojnë fjalët, prandaj do të flas sërish me votë, më 11 dhjetor. Faleminderit që më vlerësuat! Primare të papara! Energji e jashtëzakonshme demokratësh! Respekt për të gjithë, sidomos për të 6 kandidatët e tjerë në këtë proces! Jemi bashkë.
Demokratë e simpatizantë, vazhdojmë sëbashku”, mbyll postimin e tij në Facebook kandidati tjetër.
