Duke parë reklamat e orëve të dorës në revista, në billborde të ndryshme të vendosura në qytete apo të publikuara në faqe të ndryshme në internet, vihet re krejt lehtësisht se orët tradicionale, me numërues dhe akrepa, në shumicën e rasteve shënojnë 10:10. Ky është një aspekt që zakonisht nuk i kushtohet shumë vëmendje, por ka qenë praktikë e zakonshme prej disa kohësh mes atyre që janë të përfshirë në kativitetet e promovimit të shitjeve në kompanitë e orëve.
Në fakt, ideja që ky rregullim i akrepave i jep më shumë rëndësi markës së orës dhe në përgjithësi, krijon një simetri më të madhe, një element ky i vlerësuar nga klientët është shumë i njohur dhe i miratuar nga kompanitë publicitare.
Për këtë arsye, ora 10:10 konsiderohet një kohë standard në reklamat e orëve të dorës kryesisht për arsye marketingu, megjithëse kanë qarkulluar shumë mite të ndryshme urbane që lidhen me kohën e hedhjes së bombës atomike në Hiroshima (edhe pse ndodhi në orën 08:15) ose të bombës atomike në Nagasaki (që ndodhi në orën 11:02) gjatë Luftës së Dytë Botërore.
“Është një lloj rregulli i pashkruar që kushdo e kupton, fotografimi i orëve ndalon në 10:10”, deklaroi Anderë Block, nënkryetar ekzekutiv i kompanisë amerikane të orëve luksoze Tourneau, në vitin 2008, duke folur për Nju Jork Times.
Mirëpo, përpara se ora 10:10 të bëhej një standard i përbashkët i reklamimit të orëve të dorës nga të gjitha kompanitë, kujtojmë se duke filluar nga vitet 1940, ora 08:20 ishte koha më e zakonshme kur orët fotografoheshin për t’u reklamuar. Një rregull i tillë respektonte parimet simetrike dhe gjithashtu lejonte që të mos mbuloheshin elementët e rëndësishëm në fushën e orës.
Nisur nga kjo, disa kërkime marketingu të realizuara nga kompanitë e orëve zbuluan një predispozitë më të favorshme të klientëve për modelet e orëve të ndaluara në 10:10.
Në vitin 2017, një grup studiuesish nga departamentet e psikiatrisë dhe neuropsikiatrisë të Universitetit të Tubingen dhe instituteve të tjera në Gjermani, Egjipt dhe Shtetet e Bashkuara, publikuan disa rezultate të një studimi që ishte kryer tek 46 persona, i botuar në revistën shkencore Frontiers in Psychology, dhe që tregonin orare të ndryshme me kohë fikse si në 10:10, 08:20 dhe 11:30. Pjesëmarrësit në këtë studim, përballeshin me disa fotografi orash që tregonin kohë të ndryshme, ndërsa studiuesit mundoheshin të kapnin reagimin e tyre për çdo fotografi të treguar.
Nisur nga këto reagime emocionale, në çastin e përballjes me reklamat e orëve, pjesëmarrësit shfaqnin edhe propabilitetin e blerjes për secilën orë. Rezultatet treguan një preferencë të qartë për fotografinë e orëve që ishin fiksuar në kohën 10:10, veçanërisht kjo gjë u vu re tek femrat, të cilat shfaqnin një shprehi më të theksuar të emocioneve përballë kësaj kohe./Liberale.al/
