Nga ora 08:00, për shkak të përkeqësimit të situatës hidrometeorologjike, duke nisur nga dita e sotme dhe deri të dielën (24 shtator) është ndaluar dhënia e lejes për të gjitha mjetet e vogla lundruese anijeve të peshkimit që operojnë jashtë gjirit të Vlorës.
Po ashtu, mjetet e vogla lundruese dhe anijet e peshkimit që operojnë brenda gjirit të Vlorës duhet të marrin në konsideratë kushtet e përkeqësuara të motit dhe marrjen e masave për sigurimin e tyre.
“Në bazë të parashikimit për situatën hidrometeorologjike të përkeqësuar në gjirin e Vlorës dhe jashtë saj gjatë datave 22-23-24.09.2023 duke filluar nga ora 08:00 datë 22.09.2023 në drejtimin Jug-Jug-Lindje në forcën deri 6bft me shpejtësi ere deri 15m/s, dhe lartësi dallge deri 2.50m brenda gjirit të Vlorës dhe jashtë gjirit të Vlorës në forcën deri 7bft me shpejtësi ere deri 25m/s dhe lartësi dallge nga 2.00 deri 2.50 metra.
Është ndaluar dhënia e leje – nisjes gjatë datave 22-23-24.09.2023 duke filluar nga ora 08:00 për të gjitha mjetet e vogla lundruese, anijeve të peshkimit që operojnë jashtë gjirit të Vlorës dhe janë njoftuar për marrjen e masave për sigurimin e tyre.
Mjetet e vogla lundruese dhe anijet e peshkimit që operojnë brenda gjirit të Vlorës të kenë në konsideratë kushtet e parashikuara të përkeqësuara dhe marrjen e masave për sigurimin e tyre”, thuhet në njoftim.
Sa i përket anijeve të transportit ndërkombëtar detar, lëvizja do të vijojë normalisht. Situata hidrometeorologjike në gjirin e Vlorës do të përmirësohet pas orës 12:00 të 24 shtatorit.
Pritet që kontinenti të përfshihet këto ditë nga stuhi dhe përmbytje. Nuk dihet sesa do të preket rajoni ynë dhe veçanërisht Shqipëria.
