Brunello Cucinelli njihet si “mbreti” i Kashmirit, por jo vetëm, ai është humanist dhe njeriu i 24-t më i pasur i Italisë, sipas Forbes.
Gjatë një interviste në një media italiane ai u shpreh se: “Unë ndër më të pasurit në Itali? Diçka fort e bukur. Kur isha i ri nuk kisha para, jetoja në fshat, i buzëqeshja jetës dhe argëtohesha pa masë. Pastaj bëra para”.
Sipas “Huffington Post”, ai u shpreh se kur filloi të fitonte pak para, gjithmonë i drejtohej Zotit: më ndihmo të mbetem vetvetja.
“Por si i rritur dhe si njeri i pasur, mund të them se me para nuk mund të gjesh qetësinë shpirtërore, gjë që mund të arrihet edhe vetëm duke parë qiellin, apo Krijuesin ”, u shpreh ai.
Ndërsa më pas Cucinelli vijoi: “Të paktën për tre orë në ditë, Krijuesi më magjeps. Shpirti është i pavdekshëm, kjo është arsyeja pse unë dua të punoj për të mbrojtur njerëzimin, edhe pse një pjesë shumë të vogël”.
Për këtë arsye ai ëndërron të jetë prift, por me kohë të pjesshme.
“Për mua gjëja më e mirë do të ishte të isha një murg me kohë të pjesshme sepse çdo qenie njerëzore duhet t’i kushtojë, nëse mundet, tre orë në ditë shpirtit”, tha ai më tej.
Ndërsa kur bëhet fjalë për biznesin ai vuri në dukje diçka të padëgjuar ndonjëherë: “sipërmarrësi humanist”.
“Unë jam përpjekur gjithmonë të bëj një fitim të drejtë me biznesin tim, në një mënyrë etike, dinjitoze dhe morale. Fitimi duhet të jetë i ekuilibruar me dhuratën: gjyshi im jepte gjithnjë tufëzën e parë të grurit komunitetit, ndërsa pjesa tjetër ishte për ne. A vlen kjo edhe për pagën? Sipërmarrësi ka një ide të qartë në këtë drejtim: “Unë besoj se paga ime, në raport me menaxherët më të lartë, nuk duhet të jetë më shumë se 8 ose 9 herë mbi mesataren”, u shpreh Cucinelli. / Huffington Post
