Panairi i Punës 2023/ 125 punëdhënës përballë studentëve të UET

Presidenti i UET, Selami Xhepa foli për nevojën e bashkëpunimit të biznesit me akademinë për të adresuar gërryerjen në tregun shqiptar të punës. Presidenti i Unionit të Prodhuesve Shqiptarë, Arben Shkodra foli për një vakancë rreth 60 përqind në tregun e prodhimit vendas, që sipas tij mbushet nëse studentët orientohen mirë. Kreu i Shoqatës së Operatorëve Turistikë tha se shpreson që turizmi të shndërrohet në një industri të rëndësishme punësimi, duke e parë këtë sektor bashkë me bujqësinë si më kryesorët në vend

Në botën e sotme, të sunduar nga përdorimi i teknologjive, rrjetet sociale janë kthyer në instrument kryesor i departamenteve të Burimeve Njerëzore, për rekrutimin e stafeve.
Megjithatë, veprimtaritë me prani fizike, si panairet e punës, mbeten të pasfidueshme. Kështu e mendon presidenti i Universitetit Europian të Tiranës, Selami Xhepa, i cili çeli Panairin e Punës për vitin 2023, në mjediset universitare. Rreth 125 punëdhënës sollën ofertat e tyre përballë studentëve të UET, ndërsa aktiviteti solli mundësi konkrete punësimi apo internshipi për të gjitha disiplinat, në të pesë fakultetet.
“Sot po përjetojmë ndryshime rrënjësore; e gjithë bota e biznesit po i përjeton në këta katër vitet e fundit. Balanca e forcës sot duket qartazi që është zhvendosur nga punëdhënësi te punëmarrësi. Pritet e kemi një uri shumë të madhe të tregut, jo vetëm në Shqipëri por në rang global”, tha gjatë ceremonisë së çeljes së Panairit, presidenti Xhepa.
Ai tha se janë rreth 85 milionë vende pune që priten të mbeten të paplotësuara e që për brezin e ri nënkupton një oportunitet që ekonomisti i njohur e cilësoi si të jashtëzakonshëm, “…por edhe një sfidë për komunitetin e biznesit për të përkthyer interesat e brezit të ri në oportunitete dhe propozime konkrete”, shtoi presidenti i UET.
Kompani ndërtimi, sigurimesh, media të ndryshme, real estate, sektori bankar, spitale e klinika, studio ligjore, studio inxhinierie e arkitekturore e shumë operatorë të tjerë, iu bashkuan aktivitetit të UET, i cili e vijon traditën për të trembëdhjetin vit. Kjo është një nismë që vjen edhe nga qasja e këtij universiteti për ta vendosur studentin në qendër, duke i kthyer çdo vit mjediset e tij edhe si një mundësi praktike, ku studentët prezantohen me botën e biznesit, në dyert e akademisë.
“Bota e biznesit ka nevojë për studentë…Një nga debatet me botën akademike është se kush vjen i pari ku. Ne duhet të vijmë tek ju dhe ju tek ne”, u shpreh presidenti i Unionit të Prodhuesve Shqiptarë, zoti Arben Shkodra, i pranishëm në këtë panair.
Ai foli rreth nevojës për t’i bërë veprimtari të tilla më të gjera e më gjithëpërfshirëse.
“Bota po shkon në një dimension shumë herë e më të përqendruar e të elaboruar të globalizimit. Duke qenë se, kjo botë globale është kaq e strukturuar, nuk mund të pengojmë atë fenomen siç është emigrimi i të rinjve, që ka ardhur vrullshëm në Shqipëri. Duhet të diskutojmë drejtpërdrejt me çdo student në të gjitha universitetet, sepse emigrimi nuk është vetëm oportunitet por sfidë”.
Zoti Shkodra nënvizoi se punësimi në Shqipëri është kthyer në një sfidë të madhe dhe tha se 2023-shi, duhet të ishte viti i një diskutimi të gjerë e shumëpalësh mbi punësimin. Ai foli për një vakum që kap shifrën prej 60 përqind në prodhimin vendas, duke thënë se kjo vakancë plotësohet “nëse orientojmë më mirë punësimin e të rinjve”.
Presidenti i Unionit të Prodhuesve Shqiptarë ndau tre mesazhe në fjalën e tij, ku së pari iu drejtua studentëve e më pas biznesit dhe botës akademike. “ E rëndësishme që studentët mos kryejnë thjesht vitet akademike, por të zgjedhin mirë specialitetin. Është me rëndësi të kemi njerëz të specializuar, jo thjesht me diploma bachelor. Biznesi të qaset në mënyrë më të strukturuar me botën akademike, me qëllim që të kuptojmë se cilat janë nevojat e së ardhmes dhe Akademia të ridimensionojë jo vetëm mësimdhënien por edhe orientimin akademik, sepse duhet të kemi punët e së ardhmes. Pas goditjeve të viteve të fundit si pandemia apo konflikti që po përjetojmë, bota po shkon në një drejtim krejtësisht të ri dhe duhet ta rishpikim këtë marrëdhënie”, përfundoi zoti Shkodra.
Edhe presidenti i UET, Selami Xhepa vuri në dukje edhe problematikat që po has vitet e fundit, tregu i punës në Shqipëri, duke e parë si një tharje e gërryerje që krijon shqetësime serioze në zhvillimin e ekonomisë.
“Efektet afatshkurta po ndihen, por ato afatgjata do të ndihen edhe më shumë”. Zoti Xhepa foli edhe për nevojën e bashkëpunimit më të ngushtë të botës së biznesit me atë akademike për adresimin e këtyre shqetësimeve. “Nuk ka dyshim që brezi i ri janë agjentët e vërtetë të ndryshimit, ata që përqafojnë teknologjitë dhe oportunitetet e reja. Por, nëse nuk përkthehen në mundësi konkrete për këtë brez do të jetë shumë e vështirë që në këtë konkurrence të fortë globale, t’i mbajmë dhe zhvillojmë këto burime njerëzore ku kemi investuar, së pari prindërit, pastaj shoqëria dhe universitetet. Duhet t’i shohim në mënyrë serioze këto shqetësime për t’i përkthyer në politika konkrete. Nëse politika nuk bashkëpunon me sektorin privat dhe me universitetet, do të jetë shumë e vështirë ta adresojmë këtë lloj konkurrence të fortë që po bëhet sot sidomos nga vendet e zhvilluara”, përfundoi presidenti Xhepa.
I ftuar në ceremoninë e çeljes së Panairit të Punës në UET ishte edhe kreu i Shoqatës së Operatorëve Turistikë, Zak Topuzi. Ai tha se sektori i turizmit siguron 22 përqind të Prodhimit të Brendshëm Bruto në Shqipëri dhe tha se brenda vitit 2023 ky sektor do të dyfishohet, gjë që çon në rritjen e kërkesave për punonjës, si edhe shtim të kapaciteteve akomoduese. Ai vërejti se më shumë se gjysma e këtyre kapaciteteve janë në fakt vila dhe apartamente që menaxhohen nga iniciativa individuale, kryesisht nga të rinj. Ai i nxiti të rinjtë të provojnë në këtë sektor, duke zbuluar se rishikimi i ligjit ka sjellë thjeshtim dhe qeveria mund të financojë deri në 70 përqind të këtyre iniciativave, që çohen përpara nga të rinjtë, veçanërisht në agroturizëm. “Shpresoj që turizmi të jetë industri e rëndësishme punësimi, pasi mesa shoh në Shqipëri, turizmi dhe bujqësia do të jetë, kurse për industritë e tjera do të jetë e vështirë”, tha zoti Topuzi.
Presidenti i UET, Selami Xhepa i ftoi studentët ta shihnin Panairin si një mundësi konkrete punësimi, në 125 stendat e punëdhënësve shqiptarë, nga ata të vegjël, të mesëm e deri edhe të mëdhenj. Që prej themelimit të tij, Universiteti Europian i Tiranës ka punuar në përshtatjen e kurrikulave dhe programeve të studimit me kërkesat e tregut të punës, duke ngritur edhe Bordet e Tregut të Punës, që sjellin edhe zërin e parë të nevojave që hasin për profesionistë. Po ashtu, UET është i përfshirë në projektin 500+”, që e bën këtë institucion të arsimit të lartë të jetë në kontakt dhe bashkëpunim me më shumë se 500 biznese nga e gjithë Shqipëria, që u vjen në ndihmë studentëve për praktika profesionale dhe punësim.
Prej këtij viti, studentët e UET kanë një tregues më shumë të cilësisë, që i vjen me logon e agjencisë britanike të akreditimit, QAA, e cila e vlerësoi pozitivisht në dhjetë standardet europiane këtë institucion të arsimit të lartë. Lidership i shkëlqyer, këshillim frytdhënës për studentët e ardhëm dhe bashkëpunim i fortë me grupet e interesit nga industria e biznesi, si edhe ofertë akademike që pasqyron kërkesat e tregut të punës për profesionistë të rinj. Ky është edhe një hap i rëndësishëm në vizionin e ndërkombëtarizimit që UET ka, për t’i përgatitur studentët e tij drejt një tregu global pune.