Lulzim Basha rikthehet në skenë. Kryetari i dorëhequr i Partisë Demokratike ka kujtuar sot dy momente historike të popullit shqiptar, të të njëjtit vit, në Tiranë dhe Prishtinë.
Basha në profilin e tij zyrtar Facebook vazhdon të jetë Kryetar i Partisë Demokratike të Shqipërisë. Edhe pse është dorëhequr ai nuk ka ndryshuar asgjë nga detyra që mbante, çka tregon se ambicia e tij mund të jetë rikthimi në muajin shtator, dhe me gjasa, përmes një platforme të re.
Gjithsesi, përmes dy postimeve, në profilin e tij zyrtar, Basha, pasi kujtoi paradite 2 korrikun e vitit 1990 kur shqiptarët u dyndën nëpër ambasadat perëndimore, duke i dhënë fund izolimit komunist, pasdite kryetari i dorëhequr për t’i hapur rrugë zgjedhjeve të reja në Partinë Demokratike ka ndarë një postim ku kujton Deklaratën Kushtetuese të 2 Korrikut 1990, që frymëzoi dhe solli më tej çlirimin e Kosovës.
Postimi i pasdites nga Basha për Kosovën:
“32 vjet më parë, gratë dhe burrat e Kuvendit të Kosovës rindezën pishtarin e lirisë dhe shënuan kthesën e madhe në historinë e Kosovës. Një ditë e madhe, një ditë e bekuar për shqiptarët në të dyja anët e kufirit”.
“Deklarata Kushtetuese e 2 Korrikut 1990 është gurthemeli i shtetit të Kosovës, është hapi i parë drejt pavarësisë së Kosovës, që u ndërtua me Lëvizjen paqësore për Republikë dhe Pavarësi drejtuar nga Ibrahim Rugova dhe kulmoi me luftën e Ushtrisë Çlirimtare të Kosovës, për t’u realizuar e plotë në 17 shkurt 2008”.
“Kosova ka ditur ndër shekuj të tregojë guxim, forcë e largpamësi përballë sfidave të shumta që ka kaluar në historinë e saj”.
“Sot, ndërsa Kosova përgatitet për të hedhur hapa përpara drejt anëtarësimit në NATO dhe në Bashkimin Europian, kam bindjen se me të njëjtin përkushtim dhe angazhim që luftuan për pavarësi, burrat dhe gratë, lidershipi i saj politik, do t’ia dalin të bëjnë realitet anëtarësimin në institucionet euroatlantike, vendin që ëndërruan ata që punuan dhe dhanë jetën për të”.
Paraditen e sotme, përmes një postimi në Facebook, Lulzim Basha kujtoi 2 korrikun e vitit 1990, kur shqiptarët u futën në ambasadat perëndimore, duke i dhënë fund izolimit komunist:
“Më 2 Korrik 1990, duke u futur nëpër ambasadat perëndimore, shqiptarët rrëzuan murin e parë të diktaturës, në një sfidë vendimtare ndaj regjimit komunist, që atë verë do të niste fillimin e fundit të tij. Një akt guximi qytetar, që do të kristalizohej pak muaj më vonë me Lëvizjen Studentore, e cila çeli rrugën e demokracisë për aq gjatë të mohuar dhe afroi përsëri Shqipërinë me Perëndimin”.
“Atëbotë, sytë e çdo shqiptari ishin drejt vendeve të lira, me shpresën e një jete më të mirë për veten dhe fëmijët e tyre, ashtu siç fatkeqësisht janë ende sot, sepse sfida për ta e ka ngritur Shqipërinë në lartësinë e aspiratës për ta bërë si gjithë Europa, e cila mbetet ende e papërmbushur”.
“Fatkeqësisht, 32 vite më vonë, shqiptarët po ikin sërish masivisht në kërkim të mundësive, të një jete më të mire për veten dhe familjet e tyre”.
“Në 8 vitet e fundit, më shumë se gjysmë milioni shqiptarë kanë lënë vatrat e tyre për të marrë rrugën e kurbetit. Ata detyrohen të ikin, sepse në atdheun e tyre ata vidhen, ata nëpërkëmben, ata s’kanë asnjë mundësi për të jetuar të tashmen dhe për të ndërtuar të ardhmen e tyre”.
“Ndaj, përkujtimi i kësaj ngjarjeje historike, që pati forcën për ta përkulur regjimin komunist, shërben si një moment reflektimi, për t’u përballur me të shkuarën që rrezikon të përsëritet, sidomos përballë plagës së largimit të qindra-mijëra bashkëqytetarëve tanë, që tashmë nuk ikin prej diktaturës enveriste, por nga diktatura e korrupsionit, e cila nën qeverisjen e Edi Ramës ka marrë përmasat e një rreziku kombëtar”, shkroi Lulzim Basha./Liberale.al/
