Aktualitet

"Nuk e vendosim ne kush duhet ta udhëheqë", Celibashi: PD-ja mund të mos regjistrohet për zgjedhjet

Shkruar nga Liberale
"Nuk e vendosim ne kush duhet ta udhëheqë", Celibashi: PD-ja

Kryetari i Komisionit Qendror të Zgjedhjeve, Ilirjan Celibashi ka thënë sot, se procesi i verifikimit për të zgjidhur "luftën" e zhvendosur të PD-së në KQZ do jetë në përputhje me ligjin dhe se, nuk ka simpati e as mbështetje për dy kampet opozitare.

Celibashi është shprehur se edhe sfondi politik do jetë një ndër elementët që do ndikojë në në gjykimin e tij për këtë çështje.

“Nëse do të isha shumë formal, përgjigjja do ishte që do ta merrni vesh në momentin që do ta vendos. Por nuk dua të bëj hipokritin dhe të them që nuk e njohim realitetin politik të momentin. Edhe unë i ndjek lajmet dhe i shoh zhvillimet dhe kam gjykimet e mia. Kur të vijë puna e vendimmarrjes do të jetë rrjedhojë e gjykimit dhe vlerësimit tim. Kemi dy propozime për anëtarë të KZAZ-ve nga zoti Indrit Sefa i cili është përfaqësues i PD-së në KQZ që prej marsit të vitit të kaluar. Kemi edhe një propozim të sjellë nga Flamur Noka në cilësinë e sekretarit të përgjithshëm të PD-së. Formalisht kemi dy kërkesa dhe komisioneri do të duhet të bëjë vlerësimin e legjimitetit. Jemi në proces të verifikimit të dokumentacionit mbi propozimet për anëtarë të KZAZ-ve, jo vetëm të PD-së, por edhe të tre partive të tjera. Është një procedurë që rëndom KQZ e ka bërë. Ne do të vendosim për këtë, nuk është shumë e udhës të them se kështu do të vendos. Realisht më vjen keq që gjendemi në këtë situatë, jo për KQZ-në. Nuk kemi asnjë lloj interesi politik dhe asnjë simpati politike jo vetëm për këtë çështje, por për të gjithë procesin. Vendimmarrja do të jetë në respekt të plotë të ligjit. Do ishte naivitet nëse dikush do mendonte që kjo vendimmarrje bazohet nga urdhërimet e dikujt tjetër. E them me bindje që nuk kemi asnjë lloj droje për të vendosur në përputhje të plotë me ligjin. Nuk është çështja ime se si është ligji apo se si është situata politike. Ka të tjerë që duhet ta vrasin mendjen për këtë dhe jo KQZ-në", ka thënë Celibashi.

Kryetari i KQZ-së deklaroi se Partia Demokratike edhe mund të mos regjistrohet fare në zgjedhje për shkak të konfliktit se kush e drejton atë.

"Kërkesa si për rastin e komisionerëve ashtu edhe për regjistrimin e subjekteve zgjedhore do të vlerësohet në përputhje me ligjin. Ne nuk vendosim kush e udhëheq PD-në, apo kush do ta udhëheqë. Për ne ka një PD, është një person juridik. Ngelet për tu parë se kush e ka tagrin për të vepruar në emër të PD. Do ishte mirë që kjo çështje të ishte zgjidhur. Flitet për një parti kryesore të opozitës dhe unë mendoj se sa sështë vonë gjithkush që në një mënyrë apo një tjetër që mund të kontribuojë në zgjidhjen e kësaj situate. Do të duhet të angazhoheni për të gjetur një zgjidhje, s’mund të bëjmë sikur s’po ndodh asgjë, pasi partia kryesore e opozitës mund të mos regjistrohet. Gjithsesi, do të duhet që secili prej faktorëve institucionalë dhe politik të angazhohet për këtë proces, nuk mund ta injorojmë, të shohim çfarë vendos KQZ dhe të veprojmë", tha Celibashi.

Kujtojmë se, Komisioni Qendror i Zgjedhjeve vendosi sot që në Vorë, Kamzë dhe Elbasan do të bëhet votim dhe numërim elektronik, në kuadër të zgjedhjeve lokale të 14 majit.

Palët ranë dakord, ndërsa vendimi erdhi pas shtesës së fondit të qeverisë për këto bashki. Bëhet fjalë për një fond me një shumë prej 800 milionë lekë.

Sekretari i Përgjithshëm i KQZ-së theksoi se ky projekt pilot do të aplikohet në 335 qendra votimi në këto 3 bashki.

Liberale Newsroom

Poll
SHQIPENGLISH