Për pak ditë Shqipëria do mësojë nga KE nëse do të hapen negociatat me Bashkimin Europian ose jo. Lidhur me procesin e negociatave ka folur presidenti Ilir Meta, teksa ishte i ftuar në një takim me studentë të ekselencës të Universitetit Europian të Tiranës.
Meta tha se Shqipëria nuk u ka bërë detyrat e saj të cilat i kishte përcaktuar Bundestagu tre vite më parë. Presidenti u shpreh se vendi ynë ka humbur shumë kohë dhe nuk ka arritur rezultatet e pritshme, ndërsa ka theksuar se jo gjithçka mund të arrihet me lobingje.
“Kemi humbur shumë kohë dhe ne për fat të keq si popull dallohemi që humbasim shumë kohë. Shoqëria jonë funksionon në mënyrë evropiane, por politika është mjaft konfliktuale, është artificiale çdo gjë. Konflikti është zgjedhur si mënyrë për shmangien e llogaridhënies. Gjithë kjo tymnajë bën të pamundur që qytetarët të shohin si përdoren taksat e tyre, si qeveriset vendi e kështu me radhë. Ndaj, kjo situatë ka sjellë kushtet e Bundestagut, që kanë 3 vite që i kërkojnë. Sepse Evropa ka standarde dhe kritere për funksionimin e shtetit dhe nuk mundet kurrsesi që të rrezikojnë standardet e tyre nëse rrezikojnë cenim të tyre. Kryeministri dhe unë i kemi ditur këto gjëra, por interesi politik afatshkurtër ka dominuar mbi një interes më të madh. Gjithashtu, ka pasur një mendim të caktuar se disa gjëra zgjidhen me lobingje. Shqipëria ka lidership që nuk do të mbajë përgjegjësi për asgjë. Nuk jemi në rregull me detyrat e shtëpisë. Integrimi evropian ka detyrimet që ne i kemi patur të qarta dhe vit pas viti i kemi mbartur. Ne i kemi shtuar këto detyrime në vend që t’i realizonim, por nëse do të futësh hundët te drejtësia, kjo nuk është rruga për të krijuar besim për ndërkombëtarët”-tha Meta.
