Një vajzë 7-vjeçare britanike ka humbur jetën, në një aksident të tmerrshëm me skaf teksa ishte me pushime me prindërit e saj në Shqipëri.
“Daily Mail” e ka dedikuar një artikull tragjedisë së Himarës, nisur nga fakti se vajza e mitur ka lindur në Britani dhe ishte me shtetësi britanike, ndaj edhe e ka quajtur Jonadën ‘shtetase britanike’, pavarësisht origjinës.
Sipas artikullit, vajza e quajtur Jonada Avdia ishte duke luajtur në det pranë plazhit të Potamit, në jug të Shqipërisë, të martën rreth orës 14:00 kur u vra.
Jonada, e cila jetonte me babanë me origjinë shqiptare, Bledarin, dhe nënën e saj, në Barking, në lindje të Londrës, u godit për vdekje kur polici i cili nuk ishte në krye të detyrës në momentin e tragjedisë, Arjan Tase, kaloi me një skaf në një zonë të caktuar për notarët dhe e goditi atë.
Policia thotë se Tase – i cili është arrestuar – po zbriste anëtarët e familjes së tij nga Porto Palermo në Potami, kur ndodhi aksidenti. Ata thonë se ai kaloi me skaf nëpër një zonë të destinuar vetëm për notarët.
Pasi zbriti të afërmit e tij, ai e futi varkën përsëri në ujë në të njëjtën zonë, më pas goditi Jonadën teksa ajo po luante rreth 15 metra larg bregut. Tehet rrotulluese “shkaktuan lëndime serioze që çuan në humbje të menjëhershme të jetës”, tha një zëdhënës i policisë.
Oficeri doli sot para gjykatës së Vlorës, ku iu komunikua masa e arrestit dhe akuza. Ai kërkoi falje familjes Avdia si dhe kolegëve të tij, për ngjarjen e ndodhur.
Me qindra qirinj dhe lule janë vendosur aty ku humbi jetën Jonada, si dhe para Kryeministrisë.
Protestat kanë shpërthyer gjithashtu në të gjithë vendin, të zemëruar për vdekjen e vajzës. Me dhjetëra marshues u përleshën dje me policinë, në Tiranë.
Ata janë thirrur për dorëheqjen e ministrit të brendshëm, kreut të policisë dhe ministres së turizmit – duke akuzuar shtetin për vrasjen e Jonadës, raportojnë mediat lokale.
Është aksidenti i tretë i tillë që ndodh në plazhet e Shqipërisë këtë verë.
