Red Varaku
Është e nevojshme të bëhet edhe njëherë i qartë një deduksion logjik shumë i rëndësishëm në lidhje me domethënien e një marrëveshje përfundimtare midis Kosovës dhe Serbisë.
Kur Serbisë i kërkohet të njohë Kosovën, në të vërtetë po i kërkohet të shkëputet nga influenca ruso-kineze, sepse është e qartë që nën influencen ruso-kineze nuk do ta njihte kurre atë.
Kjo sepse ndryshe nga aleanca euro-atlantike që kërkon paqen e rajonit dhe më pas integrimin e tij në Perëndim, aleanca ruso-kineze tenton ta mbaje gjallë konfliktin midis shqiptarëve dhe serbëve, me qëllim mbajtjen e rajonit në një konflikt të ngrirë, të cilin ata të kenë mundësi ta shkrijnë në çdo moment dhe pëmes tij të kërcënojnë me destabilizim vetë Europën.
Në këtë kuptim angazhimi i Aleksandër Vuçiç për një marrëveshje me Kosovën më së pari duhet parë si një angazhim i Serbisë për tu shkëputur nga Rusia dhe Kina.
Kjo për Perëndimin do të ishte një fitore e jashtëzakonshme gjeopolitike, sepse kështu ai i heq nga duart Rusisë një nga “ushtarët e saj” më problematikë, përmes të cilit ajo ushtron aktualisht një shantazh shumë të fortë mbi Perëndimin.
Gjithashtu, kjo e kthen rajonin nga një rajon që prodhon konflikt dhe destabilitet për llogari të Moskës dhe Pekinit, në një rajon kontributor për paqen dhe stabilitetin në nivel global.
Perëndimi e ka të qartë që vendimi i Beogradit është një vendim historik për të ardhmen e tij të paktën për tridhjetë vitet e ardhshme, ndaj po sillet me shumë tolerancë me Serbinë, çka shpesh po lexohet gabimisht si mbështetje për Beogradin.
Për Perëndimin shkëputja e Beogradit nga Rusia dhe Kina është mënyra e vetme për ta shpëtuar rajonin nga pengmarrja dhe mënyra e vetme për ta shndërruar atë në një rajon të begatë me demokraci të konsoliduar dhe shtet ligjor.
Kështu rëndësia e dialogut Kosovë-Serbi nuk qëndron në faktin se kjo do të përcaktojë të ardhmen e Kosovës, sepse e ardhmja e Kosovës është përcaktuar njëherë e përgjithmonë, por qëndron në faktin se ky dialog do të përcaktojë të ardhmen e Serbisë dhe për pasojë të gjithë rajonit, ndaj është kthyer në një prioritetin e prioriteteve të Perëndimit për rajonin, sidomos në kontekstin e ri gjeopolitik të krijuar pas agresionit rus në Ukrainë.
A do të realizohet kjo këtë nuk e dimë me siguri, por ajo që dimë deri tani , të paktën prej bombardimit të Serbisë nga NATO, është vendosmëria e plotë e Perëndimit për ta shkëputur këtë rajon nga thonjtë e pisët të Rusisë./Liberale.al/
