Arkipelagu i Maldiveve, rreth 1000 kilometra në jugperëndim të Sri Lankës, në Oqeanin Indian, është konsideruar prej kohësh një nga vendet më të ekspozuara ndaj pasojave të ndryshimeve klimatike; 80 për qind e territorit të tij është më pak se një metër mbi nivelin e detit. Ndërsa, vlerësohet se për shkak të rritjes së nivelit të oqeanit një pjesë e madhe e tij, mund të zhytet plotësisht nën ujë deri në fund të shekullit.
Ndër zgjidhjet e mundshme që autoritetet lokale kanë filluar të eksperimentojnë, është një ide shumë e veçantë: ndërtimi i një qyteti lundrues që pritet të ndërtohet vetëm 10 minuta nga kryeqyteti Male dhe, kur të përfundojë si projekt, mendohet se do të jetë në gjendje të strehojë deri në 20 mijë banorë.
Nisma lindi nga bashkëpunimi mes qeverisë së Maldiveve dhe kompanisë holandeze të zhvillimit të pasurive të paluajtshme Dutch Docklands; projekti është realizuar nga firma arkitekturore me bazë në Holandë Waterstudio, e cila kohë më parë ka qenë e përfshirë edhe në projektimin e qindra rezidencave lundruese, zyrave, shkollave dhe qendrave shëndetësore në pjesë të ndryshme të botës.
Qyteti i ri lundrues do të ngrihet në një lagunë rreth 2 kilometra katrorë ku do të ndërtohen mijëra ndërtesa në formën e “ishujve lundrues”, duke përfshirë këtu shtëpi, restorante, dyqane, shkolla dhe hotele.
Ndërtesat do të pajisen me energji elektrike që do merren nga sistemet fotovoltaike dhe do të kenë sisteme kondicionimi që do krijohen përmes ujit të detit, të cilat do përdorin ujin e pompuar nga thellësi të mëdha për të ftohur dhomat. Në ishujt lundrues, të cilët do ndahen nga kanale të ndryshme, mund të lëvizësh në këmbë, me biçikletë apo skuter elektrik.
Ndërtesat lundruese do të ndërtohen në një zonë dhe më pas do të tërhiqen zvarrë drejt lagunës, ku do të lidhen me një platformë betoni të fiksuar në shtratin e detit me shtylla çeliku. Kjo strukturë ashtu edhe shkëmbi koral përreth lagunës do të lejojnë t’i japin stabilitet qytetit lundrues, duke reduktuar lëkundjet e shkaktuara nga dallgët.
Shtëpitë e para do të përfundojnë në fund të qershorit dhe banorët e parë do mund të strehohen atje në fillim të vitit 2024. Qëllimi i këtij projekti është krijimi i një qyteti që do të funksionojë brenda pesë viteve sikur të ishte një kontinent.
Prej kohësh është mësuar se si pasojë e ndryshimeve klimatike, Maldivet rrezikojnë të përmbyten nga uji dhe të zhduken komplet deri në vitin 2100. Për momentin, një nga projektet më ambicioze të nisura nga qeveria e Maldiveve është ndërtimi i ishullit artificial të Hulhumale, i cili ndodhet gjithashtu disa kilometra në veri të Male dhe është quajtur “Qyteti i Shpresës”. Ashtu si qyteti i ri lundrues, ai u projektua veçanërisht për të strehuar njerëzit që jetojnë sot në kryeqytet, i cili konsiderohet si një nga qytetet me popullsinë më të dendur. Megjithatë, projekti i këtij qyteti, hasi në disa kufizime të dukshme, si rreziku i dëmtimit të mjedisit detar dhe problemi i menaxhimit të mbetjeve.
Koen Olthuis, themeluesi i Waterstudio, i tha CNN se ndikimi mjedisor i qytetit lundrues është vlerësuar me kujdes, duke marrë në konsideratë vlerësimin e biologëve detarë dhe autoriteteve qeveritare, gjithashtu sipas tij ky qytet do të ketë një “strehim të përballueshëm”, komunitete të zgjeruara dhe banesa të sigurta mbi ujë.
Patrick Verkooijen, kreu i Qendrës Globale për Përshtatje (GCA), një organizatë ndërkombëtare që është e përfshirë në vlerësimin e zgjidhjeve të mundshme për përshtatjen ndaj ndryshimeve klimatike, duket se është dakord me një ide të tillë.
Sipas Verkooijen, ndërtimi i ndërtesave lundruese mund të jetë një strategji funksionale dhe ekonomikisht e qëndrueshme për të adresuar çështjen e rritjes së nivelit të deteve: megjithatë, mbetet shumë për t’u bërë që projektet si ky të ndërtohen të sigurtë në një shkallë më të madhe, më shpejt dhe në një mënyrë gjithnjë e më efikase./Përgatiti Liberale.al/
