Në Manhattan ka nisur sot shqyrtimi i jurisë në rastin kundër Sean “Diddy” Combs, i akuzuar për trafikim seksual dhe shantazh. Pas dëgjimit të dëshmive kontradiktore gjatë javës së kaluar, juria me 12 anëtarë do të vlerësojë provat për të vendosur nëse reperi dhe biznesmeni 55-vjeçar ka detyruar ish-të dashurat e tij të përfshihen në performanca seksuale të nxitura nga droga.
Gjyqtari Arun Subramanian ka dhënë udhëzime ligjore për jurinë, e cila nuk ka një afat kohor për vendimin, i cili duhet të jetë unanim.
Combs është përballur me akuza serioze, duke përfshirë dy akuza për trafikim seksual dhe një për shantazh. Ai ka mohuar të gjitha akuzat.
Gjatë gjykimit, dy ish-të dashurat e tij, këngëtarja Casandra “Cassie” Ventura dhe një grua e njohur si “Jane”, kanë dëshmuar se janë detyruar të marrin pjesë në shfaqje seksuale me eskorta meshkuj, ku Combs ishte prezant dhe ndonjëherë e ka filmuar ngjarjen.
Avokatët e mbrojtjes kanë pranuar se Combs ka pasur momente dhune në marrëdhënie, por theksuan se të dyja gratë ishin pjesëmarrëse me pëlqim.
Gjatë gjykimit, u shfaq edhe një video nga një hotel që tregon një sulm fizik të Combs ndaj Venturës në vitin 2016.
Rasti pritet të përfundojë me vendimin e jurisë, i cili mund të sjellë dënime të rënda, përfshirë edhe burgim të përjetshëm nëse Combs shpallet fajtor për të gjitha akuzat.
