Pamjet e ‘luftës’ janë pjesë nga ndeshja e fundit Roma-Fejnord. Mbi 20 mijë tifozë të Fejnordit, shumica ultras dhe të dehur udhëtuan në vitin 2015 për në Romë, por nuk u lejuan të futen për të parë ndeshjen në stadium, sepse u përleshën në rrugët dhe sheshet kryesore me tifozët kundërshtarë dhe policinë vendase, duke e kthyer në kaos tërë kryeqytetin italian. Bilanci: Mbi 13 të plagosur, me qindra të arrestuar, disa objekte të shkatërruara.
Mbrëmja e 25 majit do të jetë historike për Tiranën dhe për Shqipërinë. Që Tirana do të priste një finale të Kupave të Europës, ndërkohë një dekadë më parë nuk kishim asnjë stadium për të pritur ndeshjet e Kombëtares sonë, këtë ditë askush nuk e kishte imagjinuar.
Roma dhe Fejnord janë dy nga ekipet më të njohura, me tifozeritë ndër më të zjarrta të Europës, çka i jep finales rëndësi me përmasa europiane. Finalja e Europa Conference League mes tyre, në Tiranë, pritet të rezervojë një mbrëmje që do të mbetet gjatë në kujtesë.
Rreth 10 mijë bileta do të shpërndahen nga UEFA për secilën prej dy tifozerive. Nga 600 deri në 800 euro janë llogaritur shpenzimet për secilin tifoz, përfshirë biletën, udhëtimin dhe qëndrimin në Tiranë.
Në Tiranë parashikohet që të vijnë mbi 20 mijë tifozë nga secila skuadër. Pjesa më e madhe e tifozëve thjesht shoqëron ekipin, për të qenë ‘dëshmitar’ i një mbrëmjeje të paharruar. Fejnord ka 20 vite pa arritur në finalet e Kupave të Europës, kur për herë të fundit ngriti trofeun e Europa League përballë Dortmund.
Roma e Murinjos rikthehet në finale, pas vitit të largët 1991, kur humbi Kupën UEFA përballë Inter.
A do ta përballojë Tirana “pushtimin” e dy prej tifozerive më të ‘çmendura’ të Europës?
Para emocioneve dhe mbrëmjes magjike që rezervon Tirana, autoritetet shqiptare përtej ‘dehjes’ që dhuron finalja historike duhet t’i bëjnë mirë llogaritë rreth masave dhe sigurisë për mbarëvajtjen e ndeshjes deri më 25 maj, ngaqë shumica e tifozëve holandezë dhe italianë pritet të vijnë të dehur në Tiranë. A. Muraçi
/Liberale.al/
