Kryeministri i Kosovës, Albin Kurti gjatë një interviste për gazetën zvicerane “Republik” ka treguar se nuk i ka shtrënguar kurrë duart me liderin serb Aleksandër Vuçiç.
“Jo kurrë. Kjo për shkak se jemi takuar tre nga katër herë gjatë pandemisë dhe nuk ka ende një marrëveshje përfundimtare”, ka thënë ai.
Ndërkaq, Kurti ka folur dialogun me Serbinë dhe mundësinë e një konflikti me shtetin fqinj. Kurti duke folur për mundësinë e një konflikti, ka thënë se Serbia është një regjim klient i Kremlinit.
“Serbia dhe Rusia zhvillojnë stërvitje të përbashkëta ushtarake të quajtura ‘Mburoja Sllave’ dhe ‘Vëllazëria Sllave’. Pjesa më e madhe e industrisë së naftës në Serbi është në pronësi të Gazpromit.
Ministria ruse e Mbrojtjes ka ngritur zyrën e saj në kuadër të Ministrisë së Mbrojtjes së Serbisë. Serbia merr tanke dhe sisteme armatimi nga Moska. Gjermania është gjithashtu e varur nga nafta e Putinit.
Por ajo që e bën Serbinë unike në Evropë është se ajo refuzon të mbështesë sanksionet e BE-së kundër Putinit. Sot, 70 për qind e serbëve kanë një opinion pozitiv për Vladimir Putin.
Në të njëjtën kohë, mbështetja për Bashkimin Evropian ka rënë në nivelin më të ulët historik prej 30 për qind. Ky humor është përhapur edhe te serbët në Kosovë, veçanërisht në veri të vendit”, ka thënë Kurti, transmeton RTK.
