Kryetari i bashkisë së Tiranës, Erion Veliaj, publikoi imazhe nga Kopshtit Zoologjik, i cili pas transformimit është inauguruar sot prej tij dhe kryeministrit, Edi Rama.
“Tiranës i shtohet një tjetër xhevahir i ri! “, shkruan Veliaj.
Por mes kafshëve që ai ka bërë publik, shihen shumë pak prej tyre.
Madje edhe ato pak kafshë që tregoi Veliaj, pothuajse të gjithë i njohin, madje shumë shqiptarë i kanë në shtëpi.
Mes kafshëve të publikuara spikasin një lopë dhe një viç si dhe disa lepuj.
Nga kafshët e egra, vetëm një ari është shfaqur prej imazheve të publikuara sot prej kryebashkiakut. Kujtojmë se ariu i egër gjendet në shumë lokale dhe pika turistike të vendit.
Ndonëse në një tjetër foto lexohet në tabelë, e cila orienton vizitorët se aty ndodhet luani dhe tigri, dy kafshët e egra që nuk rriten në Shqipëri, nuk shihen në asnjë cep.
Një elefant ku pozojnë fëmijët, është i gdhendur në park.
“Me Kryeministrin Edi Rama, në hapjen e madhe të Tirana Zoo Park - Një hapësirë fantastike për gjithë fëmijët! Ta gëzoni!”, thotë Veliaj në komentin e tij.
Megjithatë shumë fëmijë vizituan sot parkun. /Liberale.al/