Kreu i “Rithemelimit”, Sali Berisha ka konfirmuar lajmin se, Britania e Madhe e ka shpallur “non grata”.
Në një deklaratë për mediat, nga selia blu, ish-kryeministri u shpreh se, është njoftuar me një letër se, Home Secretary ka marrë vendimin për moslejimin e hyrjes së tij në Mbretërinë e Bashkuar.
Ndërsa, më tej tregoi edhe arsyet, se pse është shpallur “non grata”.
“Disa orë pasi Edi Rama dha lajmin për vendimin që do të merrte qeveria e MB, jam njoftuar me një letër se, Home Secretary ka marrë vendimin për moslejimin e hyrjes sime në MB me arsyetimin:
1. Se ju keni lidhje të qarta me grupe të krimit të organizuar dhe kriminelë, të cilët kanë paraqitur një rrezik për sigurinë publike në Shqipëri dhe në MB dhe, se ju jeni i gatshëm t’i përdorni këto lidhje për të avancuar ambiciet tuaja politike.
2. Për korrupsion dhe pasurimin tim, dhe rretheve të njerëzve pranë meje, ku si shembull përmendet ish këshilltari për zgjedhjet Damir Fazlliç, të cilin sipas vlerësimit të tyre, unë e kam mbrojtur kur, kundër tij kanë dalë prova inkriminuese. Ndonëse, ashtu si thotë ky vendim, është konfidencial dhe, ndonëse përfaqësuesit e MB në Tiranë kane deklaruar se nuk do të publikojne emrat, unë kam marrë vendimin t’a bëj publik për qytetarët shqiptarë, para të cilëve unë kam qenë gjithnjë i vërtetë, me të mirat dhe gabimet, kam luftuar gjithnjë në mbrojtje të interesit të tyre, ashtu siç e kam vlerësuar unë”, u shpreh Berisha.
Kujtojmë se, më 19 maj të vitit të kaluar Berisha dhe familja e tij u shpallën “non grata” edhe nga Shtetet e Bashkuara të Amerikës.
