Detaje të reja janë zbuluar për kokainën që u gjend në një anije qymyri në Portin e Durrësit. Ekuipazhi i anijes, në të cilën u gjetën 53 pako me kokainë, është shoqëruar në polici.
Sipas Top Channel, qymyri është porositur nga Kolumbia nga një kompani kromi në Shqipëri, emri i së cilës nuk bëhet i ditur për shkak të hetimit.
Kokaina është kapur në hambarin e anijes “Unistream” me flamur të Antigua Barbuda nga Ishujt Karaibe. Anija është në pronësi të një kompanie gjermane, “Unistream GMHB &CO KG”.
Droga ishte e ndarë në 53 pako, në dy çanta, ndërsa kërkimi për sasi të tjera droge vijon ende mes 6500 ton qymyr.
Itinerari i anijes
Anija “Unistream” është nisur nga porti i Barranquilla në Kolumbi më 26 prill në orën 11:32 dhe ka mbërritur në Portin e Durrësit në 16 maj, një ditë më parë në orën 08:32.
Nuk dihet nëse sasia e drogës kishte si destinacion final Shqipërinë apo porti i Durrësit ishte përdorur si tranzit nga trafikantët.