“Grupi Bella ciao” kështu quhet libri me tregime me autore Vera Bekteshin i cili është vlerësuar nga juria e Libri i Karantinës, si vepra më e mirë mes 82 dorëshkrimeve. Historia e 5 shoqeve të cilat përmes një grupi WhatsApp-i, të quajtur “Bella Ciao” ndërtojnë përmes bisedave të zakonshme kohën e koronavirusit, dramacitetin e një ngjarje jo të lehtë për njerëzimin, duke e kthyer në letërsi ka marrë vlerësimet më të larta nga juria.
Libri me tregime Bella Ciao, përbehet nga pesë tregime me tema krejt të ndryshme nga njëra tjetra, por që i bashkon një fill, personazhet kryesore janë përgjithësisht gra.
Tregimi i parë, ai që i jep dhe titullin librit, përshkruan periudhën e karantinës për shkak të pandemisë së virusit të Covid 19, që është dhe ngjarja; një ngjarje aq e madhe sa që ka përfshirë gjithë planetin Tokë.
Në tregim flitet se si një virus i kohëve moderne, kërkon që dhe mjetet e komunikimit midis personazheve të jenë po të kësaj kohe, mbasi të pesta shoqet lidhen midis tyre përmes chat-it ne WhatsApp. Ato mësohen kaq shumë me këtë mënyrë virtuale komunikimi, sa që shpesh e kanë të vështirë të kujtohen se ka dhe mënyra më të shpejta siç është ajo e telefonit ku lidhesh përmes zërit, pa pasur nevojë të shkruash, por sjelljet e njerëzve, pa e kuptuar, kanë ndryshuar kaq shumë, sa që edhe zëri është i tepërt, sjell bezdi.
Si në formën e një ditari, ato, lidhen me njëra tjetrën ku ndajnë hallet e jetës së përditshme, por dhe mendimet lidhur me këtë gjëmë që po kërcënon mbarë botën, sepse janë të gjitha gra të shkolluara, që nuk tremben të japin mendim, ani pse edhe duke e kundërshtuar njëra tjetrën, megjithëse ndodhen në një kuvend virtual.
Por është edhe pjesa e njerëzve të thjeshtë, që të prek me gatishmërinë e tyre për të ndihmuar, pa përfillur rrezikun nga infektimi.
Tregimi lihet i hapur për të gjitha transformimet që pëson apo mund të pësojë ky virus kaq inteligjent, plotësisht i denjë për kohën e ndërlikuar që jetojmë.
Tregimi Në Reading flet për potencialin e madh biologjik që kanë gratë për të krijuar jetë dhe për ta mbrojtur atë me çdo mjet dhe sakrificë.
Gjimnazistet ka sërish një grup grash që shkojnë për pushime disa ditore në plazhin e okupuar prej pushtetarëve të rinj dhe zhgënjimin që pësojnë nga niveli i tyre.
Tregimi Mulliri i vjetër, një tregim shumë i shkurtër, flet për një grup sigurimsash që ende ruajnë celulat e dikurshme, megjithëse në pension, bile duke pasur ‘të drejtën’ të përflasin viktimat e tyre të dikurshme, sepse nuk kanë pësuar asgjë.
Portokajtë e kuq të Sicilisë është një tregim, për brengat dhe pasiguritë e dashurisë.
Vera Bekteshi është autore e romaneve “Vila me dy Porta”, botuar nga UETPRESS, “Ora me rërë”, librit me tregime “Një det i moçëm”. Ajo është vlerësuar nga kritika për stilin dhe cilësinë e rrëfimit në librat që ka shkruar. /Gazeta Liberale
