Globi

Fushatë në kohë pandemie, Kosova lehtëson disa prej masave anti-covid

Shkruar nga Liberale
Fushatë në kohë pandemie, Kosova lehtëson disa prej masave

Qeveria në detyrë e Kosovës ka bërë publike sot disa masa të reja lehtësuese që ishin vendosur në kuadër të protokollit për t’u mbrojtur nga koronavirusi.

Sipas masave të reja të Qeverisë së Kosovës, qytetarëve në komuna me rrezik të lartë nga përhapja e infeksionit u ndalohet lëvizja nga ora 21:30 deri në orën 05:00. Këtu përfshihen Prishtina, Fushë-Kosova, Mitrovica e Veriut, Zveçani, Obiliqi, Zubin Potoku dhe Leposaviqi, sipas rangimit të fundit të Ministrisë së Shëndetësisë më 8 janar. Në këto komuna deri më tani qytetarëve iu ishte ndaluar lëvizja nga ora 20:00.

Po ashtu, në këto komuna, operatorët ekonomikë, qendrat tregtare dhe shërbimet e gastronomisë lejohen të punojnë nga ora 05:00 deri në 21:00. Në komunat me rrezik të mesëm dhe të ulët nuk është e kufizuar lëvizja e qytetarëve, kurse puna për operatorët ekonomikë, tregtarë dhe gastronominë është e kufizuar deri në ora 22:00. Komunat me rrezik të mesëm janë: Mitrovica e Jugut, Ferizaji, Lipjani, Podujeva, Vushtrria, Parteshi, dhe Juniku, kurse tjerat i përkasin atyre me rrezik të ulët.

Personave mbi moshën 65 vjeç në të gjitha komunat iu lejohet dalja jashtë shtëpisë vetëm gjatë orarit 06:00 – 10:00 dhe 16:00 – 19:00.

Sipas vendimit, në hapësira të mbyllura ndalohet grumbullimi i qytetarëve në numër prej më shumë se 30 personave, kurse në sheshe publike parqe dhe vende publike, lejohet grumbullimi deri në 50 persona. Kjo masë vjen në një kohë kur Kosova ndodhet para zgjedhjeve të parakohshme që do të mbahen në 14 shkurt.

“Të gjitha tubimet publike të organizuara në hapësira publike të të gjitha formave, ndalohen në jo më shumë se 50 persona”, thuhet në vendim. Sipas vendimit të Qeverisë, procesi arsimor në institucionet parauniversitare, publike dhe private, fillon me datë 18 janar dhe organizohet sipas planit të Ministrisë së Arsimit dhe Shkencës. Qeveria në detyrë po ashtu, me propozimin e Ministrisë së Shëndetësisë, ka miratuar vendimin sipas të cilit “autorizohet ministri i Shëndetësisë për negocimin e kontratës për vaksina COVID-19 për furnizim”. Duke vepruar sipas propozimit të Ministrisë së Shëndetësisë, është aprovuar edhe vendimi për ndryshimin e masave të përgjithshme dhe specifike për mbrojtje nga pandemia COVID-19 në Republikën e Kosovës. Nga kjo ministri, më herët është thënë se ka marrë rikonfirmimin nga kompania amerikane, Pfizer për sigurimin e 535,000 vaksinave kundër koronavirusit. Megjithatë, kompania amerikane, Pfizer nuk e konfirmoi një marrëveshje me Qeverinë në detyrë të Kosovës, duke thënë se janë në diskutime me Qeverinë e Kosovës dhe se këto diskutimet janë konfidenciale"

Liberale Newsroom

Poll
SHQIPENGLISH